Ўзбекистон Республикаси Ички ишлар вазири бошчилигидаги ишчи гуруҳ томонидан Хоразм вилоятида ўтказилган ўрганишлар якуни бўйича Ички ишлар бошқармасида кенгайтирилган йиғилиш бўлиб ўтди. Бу ҳақда Хоразм ИИБ ахборот хизмати хабар берган.
Унда ички ишлар вазири, генерал-лейтенант П.Бобожонов, вилоят ҳокими Ф.Эрманов, вилоят ва шаҳар-туман сектор раҳбарлари, жумладан, ички ишлар, прокуратура, солиқ, шунингдек, жиноят ва ҳуқуқбузарликлар профилактикаси учун масъул бўлган барча давлат ва жамоат ташкилотлари раҳбарлари иштирок этган.
Йиғилишда 2019 йил давомида ва жорий йилнинг ўтган даврида вилоятда жиноятчиликка қарши кураш ва ҳуқуқбузарликларни барвақт аниқлаш борасида ҳамкорликда амалга оширилаётган чора-тадбирлар самарадорлигига қаратилиб, аҳоли тинчлиги ва осойишталигини таъминлаш, жамоат тартибини сақлаш ва фуқароларнинг мол-мулкларини ишончли ҳимоя қилиш, ёшлар иштирокидаги ҳуқуқбузарликларнинг олдини олиш борасида амалга оширилган ишлар ва йўл қўйилган камчиликлар танқидий таҳлил қилинди.
Шунингдек, ички ишлар вазири П.Бобожонов барча туман-шаҳарларда 4 та сектор раҳбарлари иштирокида шахсий таркиб билан суҳбатлар ўтказиб, маҳалла, ҳуқуқ-тартибот идоралари ва жамоатчилик билан ҳамкорликни кучайтириш, аҳоли учун хавфсиз шароитларни яратиш борасида топшириқларни берди.
Бундан ташқари йиғилиш давомида Хоразм вилоятида жиноятчиликни жиловлаш ва фуқароларнинг хавфсизлигини таъминлаш борасида масъул идораларнинг ўзаро ҳамкорликдаги ишларида камчиликлар мавжудлиги, вилоятнинг 254 та маҳаллаларида содир этилган ҳар еттинчи жиноят «Истиқлол», «Темир йўлчи», «Олимпия», «Дўстлик», «Маърифат», «Боғдор» ва «Тараққиёт» маҳаллалари ҳиссасига тўғри келаётганлиги таъкидланиб маҳалла ҳудудида жиноятлар содир этилишининг барвақт олдини олиш мақсадида ташкил этилган «Жамоатчилик назорати масканлари» фаолиятини йўлга қўйиш, сектор раҳбарлари иштирокида жиноятлар муҳокамасини ўтказиш борасида ҳокимлик, прокуратура, солиқ ва ички ишлар органлари ҳамда жамоатчилик етарли даражада эътибор қаратиши лозимлиги ва бу борада аниқ режага асосланган йўл харитасини ишлаб чиқиш лозимлиги таъкидланди.
Вилоятда криминоген вазиятни ижобий томонга ўзгартириш, ҳуқуқбузарликларнинг барвақт олдини олиш ва жамоат хавфсизлигини таъминлаш борасидаги ҳамкорликдаги ишларни кучайтириш бўйича таклифлар ишлаб чиқилди:
- ҳар ойда туман-шаҳар сектор раҳбарлари томонидан ўзининг ҳудудида криминоген вазияти оғир, энг кўп жиноят содир этилаётган маҳаллалар аниқланиб, келгусида уларнинг жиноятчиликни жиловлаш борасидаги режалари бўйича ҳисоботи вилоят сектор раҳбарлари ҳузурида муҳокама қилиш тартибини жорий этиш;
- жиноятчилик таҳлили 2019 йил мобайнида ва 2020 йилнинг январида жиноятлар сони ошиб кетаётган Урганч шаҳрига вилоят ИИБ бошлиғининг биринчи ўринбосари Т.Қазақов ва жиноятлар салмоғи юқорилигича сақланаётган Қўшқўпир, Янгиариқ, Янгибозор ва Боғот туманларига вилоят ИИБ бошлиғининг ўринбосарларини бириктириб, уларнинг раҳбарлигида вилоят даражасидаги тегишли идора ва ташкилотлар вакилларидан иборат ишчи гуруҳ тузиб, вазиятни ижобий томонга ўзгартириш бўйича чораларни кўриш;
- ҳар ойда вояга етмаганлар ва ёшлар ўртасида ҳуқуқбузарликларнинг олдини олиш, уюшмаган ёшларнинг бандлигини таъминлаш, уларни жамиятнинг фаол аъзосига айлантириш борасидаги ишларни кучайтириш, шунингдек, ота-онаси узоқ муддатга чиқиб кетган вояга етмаганларга васий ва ҳомийларни бириктириш юзасидан аниқ чора-тадбирларни белгилаш бўйича топшириқлар берилди.
Йиғилиш давомида ўз хизмат вазифаларни бажаришда масъулиятсизлик ва бепарволик билан ёндашиб, хизмат вазифасини лозим даражада бажармаганлиги учун вилоят ИИБ ҳарбий сафарбарлик бўлими бошлиғи Р.Ходжиев, Эксперт-криминалистика бўлими бошлиғи Қ.Ўринов, Хива тумани ИИБ бошлиғининг биринчи ўринбосари Д.Мадрахимов ва Ҳазорасп тумани ИИБ Миграция ва фуқароликни расмийлаштириш бўлими бошлиғи А.Юсупов ва яна 6 нафар профилактика инспекторлари эгаллаб турган лавозимларидан озод қилинди. Шунингдек, бир қатор ходимларга интизомий жазо чоралари қўлланилди.
Учрашув якунида сўз олган вилоят ҳокими Ф.Эрманов йиғилишда таъкидланган камчиликлар юзасидан фикр билдириб, келгусида ушбу йўналишдаги ишларни сифат жиҳатдан янги босқичга олиб чиқиш, жиноятчиликка қарши кураш ва ҳуқуқбузарликларни барвақт олдини олиш бўйича йўл хариталарни ишлаб чиқиш ва амалга ошириш юзасидан мутасаддиларга тегишли кўрсатма ва топшириқлар берди, дейилади Хоразм ИИБ ахборот хизматининг хабарида.
Изоҳ (0)