Жиноят ишлари бўйича Наманган шаҳар судида бир ойлик чақалоғи бор аёлини калтаклаб, унинг ўлимига сабабчи бўлган 30 ёшли Абдураҳмон Азимовга (исм-шарифлар ўзгартирилган) оид жиноят иши кўриб чиқилди. Бу ҳақда «Дарё» мухбири Азизбек Абдувалиев хабар бермоқда.
Воқеа 2019 йил 25 августга ўтар кечаси содир бўлган. Шу куни кечга яқин уйига келган Абдураҳмон овқатланиб бўлганидан сўнг турмуш ўртоғи, июль ойида илк фарзанди — қизалоқни дунёга келтирган Маҳфуза Мирзаева билан гўё уй саришта бўлмагани боис жанжаллашади. Унинг юзига уриб, қорнига тепади. Аёли букчайиб, ётиб қолганидан сўнг эса онасини чақириб, ўзи бошқа хонага чиқиб кетади.
Судланувчининг таъкидлашича, «турмуш ўртоғининг олган тан жароҳати ўтиб кетиб, эрталабгача яхши бўлиб қолади деб ўйлаб, тез ёрдамга мурожаат қилмаган. Сўнг ухлаб қолган, эрталаб эса уни онаси уйғотиб, хотини вафот этганлигини айтган».
Маҳфуза Мирзаеванинг ўлими юзасидан суд-тиббий экспертиза ўтказилиб, унда марҳуманинг ўлимига талоқ ёрилиши, бунинг оқибатида ички қон кетиб, юрак қон-томир етишмовчилиги сабаб бўлганлиги билдирилган. Аёлнинг ўлимига сабаб бўлган асоратлар ҳаёт учун хавфли оғир тан жароҳатлари туркумига киради.
ЖИБ шаҳар суди судьяси Нодирбек Райимқулов маълум қилишича, Абдураҳмон Азимов Жиноят кодексининг 104-моддаси 3-қисми «д» бандида назарда тутилган жиноятни содир қилганликда айбдор деб топилди. Унга нисбатан 9 йил озодликдан маҳрум қилиш жазоси тайинланди.
Шунингдек, судланувчидан жабрланувчи томон сўраган жами 910 миллион сўм моддий ва маънавий зарар ўрнига 20 миллион сўм маънавий зарар ундириш лозим деб топилди.
Абдураҳмон Азимовни оталик ҳуқуқидан маҳрум қилишни сўраб киритилган ариза юзасидан эса мазкур тоифадаги ишларни кўриб чиқиш фуқаролик ишлари бўйича судларнинг ваколатига кириши тушунтирилди.
Қайд этиш жоизки, марҳуманинг ота-онаси суд ҳукмидан қониқиш билдирмади. Улар юқори турувчи судга мурожаат этишини маълум қилди.
Изоҳ (0)