Ухандаги шифохона раҳбари коронавирусдан вафот этгани хабар қилинди. Кейинчалик ушбу маълумот инкор этилди

Уханда вақтинча очилган шифохоналардан бирининг раҳбари COVID19 коронавируси келтириб чиқарган касаллик оқибатида вафот этди. Бу ҳақда «Жэньминь Жибао» газетасига асосланиб «РИА Новости» хабар берган.

«Учан» касалхонаси директори Лю Чжимин 17 февраль куни COVID19 коронавируси билан касалланиш оқибатида вафот этди. У коронавирусдан ўлим топган биринчи тиббиёт муассасаси раҳбари», – дея ёзган нашр.

Бироқ кейинчалик Daily Mail нашрининг ёзишича, газета ушбу хабарни ўз расмий сайтидан ўчириб ташлаган. Хубэй соғлиқни сақлаш департаменти вакили Лю Чжимин вафот этмагани ва реанимацияда оғир аҳволда эканини билдирган.

Хитой ҳукумати 2019 йил 31 декабрида Жаҳон соғлиқни сақлаш ташкилотига Хубэй провинциясининг Ухань шаҳрида пневмонияга сабаб бўладиган номаълум коронавирус тарқалгани ҳақида хабар берган. ЖССТ коронавирусни халқаро даражадаги фавқулодда вазият деб баҳолаб, вирусга COVID-2019 расмий номини берган. Хитой Миллий соғлиқни сақлаш комиссияси маълумотларига кўра, сўнгги бир сутка ичида мамлакатда коронавирус қурбонлари сони 142 кишига кўпайиб, яна 1323 киши касалликни юқтириб олган. 16 февраль ҳолатига кўра, Хитойда 68 500 ҳолатда коронавирус билан хасталаниш қайд этилган, жаҳон бўйича эса 69 мингдан ортиқ инсон вирус билан инфекцияланган. Хитойда коронавирус қурбонларининг умумий сони 1665 кишига етган, 9 419 киши эса касалликни енгиб ўтиб, тузалишга муваффақ бўлган.

Хитойнинг материкли қисмида коронавирусга чалинганлар сони 70,5 мингдан ошган, 1 770 нафар одам касаллик оқибатида ҳалок бўлган, 10,8 минг нафар бемор ундан тузалиб кетган. Хитойдан ташқарида 700 га яқин одам коронавирус юқтириб олгани аниқланган.

Хитойдан ташқарида касалланганлар сони бўйича энг юқори кўрсаткич Японияда — 16 февраль ҳолатига кўра, у ерда 338 киши коронавирусни юқтириб олган. Сингапурда 72 киши, Гонконгда 56 киши, Таиландда 33 киши, Жанубий Кореяда 28 киши айнан шу ташхис билан касалхонага ётқизилган.