Санкт-Петербургда яшовчи Алла исмли аёл Хитойдан қайтганидан сўнг 14 кунлик коронавирус карантинга жойлаштирилган касалхонадан қочиб кетгани ҳақида хабар берилган эди.
Meduza’нинг маълум қилишича, Петроград туман суди шаҳарнинг бош санитария ходими коронавирус карантинидан қочган Алла Ильинани мажбурий касалхонага ётқизиш тўғрисидаги маъмурий даъвосини қондирди.
Суд қарорида таъкидланишича, аёл касалхонада камида 19 февралгача, унинг таҳлил натижалари тайёр бўлгунга қадар ётиши керак. Ильина суд қарорини бажаришга ваъда берган.
Эслатиб ўтамиз, 32 ёшли Алла Ильина 7 февраль, жума куни, касалхонадаги карантин изолятори электрон қулфини бузиб, қочиб кетган эди. Касалхона бош шифокори аёлнинг хатти-ҳаракатларини безорилик деб атаган ва судга мурожаат қилган.
Судга тақдим этилган тиббий ҳужжатлардан маълум бўлишича, Боткина касалхонасининг яна уч нафар бемори карантиндан қочиб кетган, аммо уларнинг икки нафари яна касалхонага қайтиб келган.
Сўнгги маълумотларга кўра, Хитойда коронавирус билан касалланганларнинг умумий сони 70 548 кишини ташкил қилмоқда. Хитойда коронавируснинг авж палласи ортда қолиб, янги касалланганлар сони аста-секин камайгани ва келажакда вазиятнинг яхшиланишини кутиш мумкинлиги айтилди.
Аввалроқ Хубэй провинциясида коронавирус сабаб ўлаётганлар сони камая бошлагани маълум қилинган эди. Шунингдек, Хитойда коронавирусга қарши курашда «ҳал қилувчи палла» келгани, коронавирус билан касалланган, бироқ хасталигини қасддан яширган ёки сафарлари тарихини ошкор қилмаган фуқароларга нисбатан жиноий жавобгарлик жорий этилиши мумкинлиги хабар берилган.
Хитойдаги йирик фармацевтика компанияларидан бири Zhejiang Hisun Pharmaceutical ҳукуматдан COVID-19 коронавирусига қарши «Favipiravir» потенциал дори воситасини сотишни бошлаш бўйича рухсат олди.
Изоҳ (0)