Xitoy kommunistik partiyasi markaziy komissiyasi tartib-intizom masalalarini tekshirish uchun Uxan shahriga tekshiruv guruhini yubordi. Bu haqda CCTV xabar bergan.

Tekshiruv guruhi doktor Li Venlyanning o‘limi bo‘yicha har tomonlama jiddiy surishtiruv ishlarini olib boradi, deyiladi xabarda.

2019-yil dekabrida Li Venlyan birinchi bo‘lib dengiz mahsulotlari sotiladigan bozori ishchilarida noma’lum virusga chalinish alomatlari borligini aniqlagandi. U kasallikning 2003-yilda tarqalib, atipik pnevmoniya hastaligini keltirib chiqargan SARS virusi bo‘lishi mumkinligini taxmin qilgan. Shifokor Weibo ijtimoiy tarmog‘i orqali ushbu vaziyatni hamkasblari bilan muhokama qilgan.

Ushbu voqeadan keyin Venlyan va uning hamkasblari politsiyaga chaqirilgan, ulardan bu kabi axborotlarni tarqatishni to‘xtatib jamoat tartibini buzganlik bo‘yicha aybni yozma ravishda tan olish talab qilingan.

Shifokor ishiga qaytgach, 10-yanvarda uning bemorlaridan birida 2019-nCoV koronavirusi aniqlangan. Ikki kun o‘tgach Venlyanning o‘zi ham shifoxonaga yotqizilgan. U 7-fevralga o‘tar kechasi koronavirusdan keyingi asoratlar oqibatida vafot etgan.

Xitoy sog‘liqni saqlash milliy komissiyasining ma’lumotiga ko‘ra, mamlakatda koronavirusdan vafot etganlar soni 636 kishiga yetgan. Vafot etganlarning katta qismi — 618 nafar odam Xubey provinsiyasida joylashgan Uxan shahriga to‘g‘ri kelmoqda. Umumiy hisobda kasallanganlar soni 31 ming nafardan oshgan.