Yaponiyadagi Diamond Princess sayohat kemasida yangi turdagi koronavirusni yuqtirib olganlar 70 kishiga ko‘paydi. Bu haqda Yaponiya sog‘liqni saqlash vaziri Katsunobi Katoning so‘zlariga asoslanib, “RBK” xabar berdi.

Foto: EPA

Shu tarzda sayohat kemasidagi koronavirus bilan kasallanganlar soni 355 kishiga yetdi. Kema Yokogama shahridagi portda karantinda qolmoqda.

Avvalroq Diamond Princess sayohat kemasida koronavirus bilan kasallanganlar soni 218 kishiga yetgani haqida xabar berilgan edi.

15-fevral kuni AQSh koronavirus sabab Yaponiyada karantinda turgan sayohat kemasidan o‘z fuqarolarini evakuatsiya qilishini ma’lum qildi. Kemada to‘rt nafar Qozog‘iston fuqarosi ham bor.

Eslatib o‘tamiz, Diamond Princess sayohat kemasi joriy yilning 20-yanvar kuni Yokogamadan chiqib, Kagosima—Gonkong—Okinava yo‘nalishidan o‘tib, 3-fevral kuni qaytib kelgan. Bu vaqtga kelib kemadagi bir necha kishi tobi qochgani haqida xabar qilgan va hukumat bortdagi barchani tekshiruvdan o‘tkazishga qaror qilgan. 11-fevral kuni sayohat kemasidagi keksalar va surunkali kasalliklarga ega bemorlarni sohilga evakuatsiya qilish boshlagan edi.