Москвадаги барлардан бирида 23 ёшли қиз ширинликдан тиқилиб ўлди, деб хабар бермоқда «Комсомольская правда» ҳуқуқ-тартибот идораларидаги манбаларига асосланиб.
Маълум бўлишича, 12 февраль куни Москвадаги «Килфиш» барида ширинлик ейиш бўйича танлов ўтказилган. Унда 12 нафар кўнгиллилар қаторида қиз ҳам иштирок этган. Баланд мусиқа, қарсаклар ва шовқин-сурон орасида қизнинг тиқилиб қолганига гувоҳ бўлганларнинг «ёрдам беринг» деган қичқириғи эшитилган. Қиз нафас ололмай қолган ва ҳушдан кетиб йиқилган.
Воқеа жойига етиб келган шифокорлар қизнинг вафот этганини аниқлаган.
Хабарда айтилишича, қиз барга дўстлари билан дам олгани кирган бўлган. Қизнинг ўзи танловда иштирок этиш учун кўнгилли равишда қатнашган. Гувоҳларнинг сўзларига кўра, у ғалабага яқин бўлган. Финал қўнғироғи чалинишига бир неча сония қолганида бир вақтнинг ўзига бир неча ширинликни оғзига тиққан, оқибатда ҳаво етишмай тиқилиб ўлган.
Ҳолат юзасидан тергов иши очилган. «Хавфсизлик талабларига жавоб бермайдиган хизматларни тақдим этиш» моддаси бўйича жиноий иш қўзғатиш масаласи кўриб чиқилмоқда.
Изоҳ (0)