Ўзбекистон Президенти Шавкат Мирзиёев 19—20 февраль кунлари Туркияга ташриф буюради. Бу ҳақда Президент матбуот хизмати хабар берди.
Шавкат Мирзиёев Анқарада олий даражадаги музокаралар ҳамда Ўзбекистон ва Туркия Президентлари ҳамраислигида икки томонлама Стратегик ҳамкорлик кенгашининг биринчи йиғилишида иштирок этади.
Стратегик ҳамкорлик кенгашининг биринчи йиғилиши доирасида сиёсий, савдо-иқтисодий, инвестициявий, молиявий, транспорт-коммуникация, таълим, маданий-гуманитар ва бошқа йўналишларда ҳамкорлик ҳолати ва истиқболлари кўриб чиқилади. Шунингдек, минтақавий ва халқаро аҳамиятга молик масалалар бўйича фикр алмашилади.
Бундан ташқари, Шавкат Мирзиёевнинг Туркия етакчи компаниялари раҳбарлари билан учрашуви, Туркия Республикаси президенти кутубхонаси мажмуасининг тантанали очилиш маросимида иштироки режалаштирилган.
Шавкат Мирзиёев Туркия раҳбари Ражаб Тоййиб Эрдўғоннинг таклифига биноан, 2017 йил 25 октябрь куни давлат ташрифи билан Туркияга ташриф буюрганди. Туркия президенти Ражаб Тоййиб Эрдўғон эса 2018 йил 29 апрель куни давлат ташрифи билан Ўзбекистонга келганди.
Изоҳ (0)