2020 йил 17 февралга ўтар кечаси Сирдарё вилояти Оқолтин тумани Сардоба шаҳарчаси «Кўркам диёр» маҳалласи Работ кўчасида жойлашган бир қаватли, 3-уй 1-хонадон (коттеж)да ёнғин содир бўлиб, бир оиланинг олти нафар аъзоси бахтсиз ҳодиса қурбони бўлган эди.
Сирдарё вилояти ҳокимлиги матбуот хизматининг хабар беришича, эрта тонгдан вилоят ҳокими, вилоят сектор раҳбарлари ҳамда ташкилотлардан иборат таркибда гуруҳ тузилиб, ҳодиса содир бўлган хонадонга борилди. Шахсан вилоят ҳокими Ғофуржон Мирзаев ҳалок бўлганларнинг яқинларига чуқур таъзия изҳор қилиб, ҳамдардлигини билдирди.
Вилоят ҳокими марҳумларнинг дафн маросимларида бош-қош бўлиб, ёнғин содир бўлган уйни қисқа муддатда таъмирлаган ҳолда воқеа содир бўлган вақтда бошқа жойда бўлган оиланинг 18 ёшли қизи О.Ў.га топширилишини ҳамда уни ўз оталиғига олиб, ҳолидан доимий хабар олиб туришини маълум қилди ва амалий ишлар бошлаб юборилди.
Шу ўринда марҳумларнинг мотам тадбирлари ва дафн маросимларини ўтказиш билан боғлиқ харажатлар учун 30 миллион сўм моддий ёрдам кўрсатилди, уларнинг маъракаларини ўтказиш учун масъуллар бириктирилди.
Шунингдек, вилоят ҳокими томонидан маросимга йиғилганлардан хонадонларда газ ва электр иситкич мосламаларидан фойдаланишда хавфсизлик қоидаларига риоя қилиш зарурлиги, акс ҳолда оқибати аянчли якун топиши мумкинлиги ҳақида қайта-қайта таъкидланди, дейилади хабарда.
Изоҳ (0)