Россиянинг Челябинск–Троицк трассасида Челябинск вилояти ҳудудида содир бўлган йўл-транспорт ҳодисасида 2 киши, жумладан, Ўзбекистон фуқароси З.С. вафот этди. Бу ҳақда Ўзбекистоннинг Екатеринбург шаҳридаги бош консулхонаси маълумотига асосланиб, ТИВ матбуот хизмати хабар берди.
Қайд этилишича, авария 16 февраль куни соат 5:30 лар атрофида содир бўлган. «ВАЗ» ҳайдовчиси қор ёғаётгани туфайли бошқарувни йўқотиб, йўлнинг қарама-қарши йўналишига чиқиб кетган ҳамда KIA Rio билан тўқнашган.
Авария оқибатида ВАЗнинг 2001 йилда туғилган ҳамда KIA Rio’нинг 1983 йилда туғилган йўловчиси воқеа жойида ҳалок бўлган.
Олти киши жароҳат олиб, касалхонага ётқизилган. Ҳодиса сабабларига ойдинлик киритилмоқда.
Бош консулхона вазиятни назоратга олди ҳамда Ўзбекистон Бандлик ва меҳнат муносабатлари вазирлиги ҳузуридаги Ташқи меҳнат миграцияси масалалари агентлигининг ваколатхонаси билан биргаликда марҳумнинг жасадини ватанга жўнатиш билан боғлиқ консуллик-ҳуқуқий ва ташкилий масалаларни ҳал қилмоқда.
«Консуллик-ҳуқуқий департаменти ЙТҲ муносабати билан ҳамдардлик изҳор этади ҳамда Россиянинг Урал федерал округи ҳудудида бўлиб турган Ўзбекистон фуқароларига улар зарурат туғилган ҳолатларда мамлакатимизнинг Екатеринбург шаҳридаги Бош консулхонасига қуйидаги телефон рақамлари орқали мурожаат қилишлари мумкинлигини эслатиб ўтади: +7 343 276 31 66, +7 343 272 31 33», — дейилади хабарда.
Эслатиб ўтамиз, 12 февраль куни Челябинск вилояти ҳудудида юз берган йўл-транспорт ҳодисаси оқибатида бир нафар Ўзбекистон фуқароси вафот этган, яна икки нафар ўзбекистонлик тан жароҳати олган эди.
Изоҳ (0)