Самарқандда автомобилларга суюлтирилган газ қуйиш шохобчасида газ ўрнига сув қуйиб берилаётгани айтилмоқда. «Дарё» мухбири Фарҳод Норбўтаевнинг маълум қилишича, ҳолат жорий йил 23 январь куни Самарқанд шаҳридаги Сўғдиёна мавзесида жойлашган «Мусаффо» МЧЖга қарашли суюлтирилган газ қуйиш шохобчасида содир бўлган. Газ олган ҳайдовчиларнинг автомобиллари ўз-ўзидан юрмай қолган. Ҳайдовчилар газ ўрнига сув қуйиб берилганлигини сервисга борган пайт билишган.
«23 январь куни соат 18:00 атрофида автомобилимга суюлтирилган газ қуйган эдим. Шохобчадан чиққанимдан сўнг машинам ўз-ўзидан юрмай қолди. Бир амаллаб устахонага олиб борганимдан сўнг газ ўрнига сув қуйилганини айтишди, — дейди Элдор Муҳаммадиев. — Автомобилларга газ ўрнига сув қуйилаётганлигининг сабаби нимадалигини билиш мақсадида шохобча раҳбари билан учрашдим. Аммо раҳбар мени куракда турмайдиган сўзлар билан ҳақоратлаб, унга туҳмат қилаётганимни айтди. Ҳатто ҳайдовчиларни муттаҳамликда айблаб, уларни ҳам изза қилди.»
Маълум бўлишича, «Шўртангаз кимё мажмуаси» масъулияти чекланган жамиятидан 16 январь куни «Мусаффо» МЧЖга 21 тонна суюлтирилган табиий газ келтирилган. Айнан шу кундан бошлаб «заправка»да автомобилларга газ тарқатила бошланган.
Элдор Муҳаммадиевнинг таъкидлашича, мазкур газ қуйиш шохобчасида харид қилинган газ учун истеъмолчиларга харид чеки берилмас экан.
«Шохобча раҳбарининг қўпол муомаласи, ҳақоратлаши етмаганидек ҳатто сотиб олинган газ учун харид чекини ҳам беришмади, — дейди Элдор Муҳаммадиев. — Тадбиркорлигини пеш қилаётган раҳбар истаганини қиладими? Ахир ҳамма ерда қонун-қоида бор. Тадбиркор дегани билганини қиламан дегани эмас-ку.»
«Мусаффо» масъулияти чекланган жамияти томонидан харидорларга чек берилмаётганлиги юзасидан вилоят давлат солиқ бошқармаси масъулларига мурожаат қилганимизда улар 1 апрелга қадар тадбиркорлар фаолиятига аралашиш мумкинмаслигини, тўғридан-тўғри уларнинг фаолиятини текшира олмасликларини маълум қилди.
Элдор Муҳаммадиевнинг таъкидлашича, бошқа ҳайдовчилар ҳам зарар кўрмаслиги учун «Мусаффо» МЧЖга қарашли ёқилғи қуйиш шохобчасига қайтиб борганида шохобча раҳбари Э.Муҳаммадиевни тадбиркорнинг фаолиятига тўсқинлик қилаётган товламачи сифатида айблаган.
«Шохобча раҳбари менга вазиятни тушунтиришга имкон ҳам бермади. Оғзидан фақат ҳақоратли сўзлар чиқиб, нафсониятимга тегди. Ёнига тўпланган тўрт-беш нафар ўзининг одамлари унга қўшилиб мени «товламачи», «туҳматчи», дея ҳақорат қилишга тушишди. Уларнинг бу ерда жанжал чиқаришдан манфаатдор эканликларини англагач, кетишга мажбур бўлдим», — дейди Э.Муҳаммадиев.
Журналистик суриштирув давомида, «Ўздавнефтгазинспекция»си Самарқанд ҳудудий бўлимига мурожаат қилдик. Инспекция раҳбари Икром Мақсудов хизмат сафари билан туманга кетганлиги боис бош мутахассис Дилшод Сайфиев билан суҳбатлашдик. «Мусаффо» МЧЖга қарашли ёқилғи қуйиш шохобчасида бўлган ҳолатни батафсил эшитган мутахассис ҳеч қандай ёрдам беролмаслигини, айни пайтда бориб тадбиркорнинг фаолиятини тўғридан-тўғри ўргана олмаслигини билдирди.
Автомашинага қуйилган суюқликнинг таркибини ўрганиб хулоса беришларини сўраганимизда инспекцияда газ маҳсулотларининг лабораторияси йўқлигини айтди.
«Ўздавнефтгазинспекция»нинг ҳудудий бўлими бошлиғи Икром Махсудов инспекция масъул ходими Дилшод Сайфиев «Мусаффо» МЧЖга қарашли автомобилларга ёнилғи қуйиш шохобчасида ҳолатни ўрганаётганлигини маълум қилди. Мазкур жараёнга бевосита иштирок этиб, автомобилга сув қуйиб бериш ҳолатини ўрганмоқчи бўлиб, ушбу «заправка»га бордик. Аммо инспекция ходими Дилшод Сайфиев ва «Мусаффо» МЧЖ раҳбари Комил исмли шахс (фамилиясини айтишни истамади) электр энергиясида узилиш бўлганлиги сабаб ҳолатни ўрганишнинг иложи йўқлигини таъкидлашди.
Шаҳар ва вилоят ҳудудий электр тармоқлари корхонаси мазкур ҳудудда электр таъминотида узилиш бўлмаганини билдириб, чироқ атайлаб ўчирилганини маълум қилди.
«Бу ҳолатга тегишли мутасаддилар томошабин бўлиб турганига ҳайронман. «Ўздавнефтгазинспекция»си Самарқанд ҳудудий бўлими раҳбариятига 24 январда мурожаат қилганман. Аммо ҳозирга қадар жавоб бўлмаяпти. Вилоят солиқ бошқармаси эса 1 апрелга қадар бирорта тадбиркорнинг фаолиятини текширишга йўл қўйилмаслигини маълум қилиб, ҳозирда мурожаатим ўрганилмаслигини айтишди, — дейди Элдор Муҳаммадиев. – Бугун юртимизда тадбиркорларга кенг имконият яратилиб, уларга турли имтиёзлар берилмоқда. Аммо ушбу имконият ва имтиёздан ғаразли мақсадларда фойдаланиб, юзлаб истеъмолчиларни сарсон қилаётган тадбиркорлар ҳам орамизда учраб турибди-да.»
Изоҳ (0)