Андижон вилоят халқ таълим бошқармаси бошлиғи ўзгарди. Бошқармага айни кунга қадар вилоят ҳокимлигида котибият мудири сифатида ишлаб келган Азизбек Миркомилов тайинланди, дея хабар беради «Дарё» мухбири.
15 февраль куни Андижон вилоят халқ таълими бошқармасида ўтказилган йиғилишда бошқарма бошлиғи Фурқат Бузруков бошқа ишга ўтганлиги муносабати билан унинг ўрнига Миркомилов Азизбек Зайнатдинович бошқарма бошлиғи этиб тайинланганлиги эълон қилинган.
Эслатиб ўтамиз, бошқарманинг собиқ бошлиғи Фурқат Бузруков жорий йил 4 февраль куни Халқ депутатлари Жалақудуқ туман кенгашининг навбатдан ташқари сессиясида туманнинг янги раҳбари сифатида таништирилганди.
Таъкидлаш лозимки, интернет сайтларида Андижон вилоят халқ таълими бошқармаси тасарруфидаги умумтаълим мактаблари фаолиятига доир кўплаб мақолалар чоп этилган бўлиб, унда умумтаълим мактабларидаги камчиликлар, ўқувчи ёшларнинг ўз жонига қасд қилиши, ўқувчилари овқатдан заҳарланган ҳолатлари тилга олинганди.
Шунингдек, Андижон шаҳар халқ таълими бўлими тасарруфидаги мактабларда ишловчи 25-35 ёшдаги, турмушга чиқмаган ва турмушидан ажраган аёлларнинг алоҳида рўйхати юритилишига оид маълумот ҳам пайдо бўлганди.
Изоҳ (0)