14 февраль куни Қонунчилик палатасининг Саноат, қурилиш ва савдо масалалари қўмитаси мажлисида Ўзбекистоннинг «Қимматбаҳо металлар ва қимматбаҳо тошлар тўғрисида»ги қонуни лойиҳасини биринчи ўқишга тайёрлаш юзасидан ишчи гуруҳи йиғилиши ўтказилди.
Қонун лойиҳаси ташаббускори – Молия вазирлиги ҳузуридаги Давлат асиллик даражасини белгилаш палатаси вакиллари.
Йиғилишда таъкидланишича, «Қимматбаҳо металлар ва қимматбаҳо тошлар тўғрисида»ги қонуни лойиҳаси Ўзбекистон Президентининг 2019 йил 18 майдаги «Ўзбекистон Республикасида заргарлик тармоғини жадал ривожлантириш чоралар тўғрисида»ги фармони ижросини таъминлаш мақсадида ишлаб чиқилган.
Лойиҳанинг мақсади келгусида ишчи муҳитни такомиллаштириш, тадбиркорлик субъектлари учун кўпроқ эркинлик ва имкониятлар бериш асосида янги иш жойларини ташкил этишдан иборатдир. Унда қимматбаҳо металлар ва қимматбаҳо тошлар давлат эгалигида бўлгани сингари юридик ва жисмоний шахслар эгалигида ҳам бўлиши мумкинлиги кўрсатиб ўтилгани билан алоҳида аҳамиятга эга.
Қўмита мажлисида депутатлар қонун лойиҳасидаги баъзи камчиликларни тузатиш, лойиҳага тааллуқли барча ҳужжатлар Қонунчилик палатаси регламентига мувофиқ тайёрланган бўлиши ва тўлиқ тақдим этилиши лозимлигини қайд этиб ўтди. Бундан ташқари, лойиҳада соҳада ишлатиладиган атама ва асосий тушунчаларнинг ҳаддан ташқари кўп ишлатилгани, айрим моддаларнинг тўғридан-тўғри ишлайдиган норма талабига жавоб бермаслиги танқид қилинди.
Мажлис якунида қўмита аъзолари ушбу лойиҳанинг қабул қилиниши қимматбаҳо металлар ва қимматбаҳо тошларни қазиб олишда, мамлакатнинг заргарлик фаолиятни тартибга солишда асосий ҳужжат бўлиб хизмат қилишини алоҳида таъкидлаган ҳолда, уни палата мажлисида биринчи ўқиш учун депутатлар ҳукмига ҳавола этишга қарор қилди.
Изоҳ (0)