Сурхондарёда уйи бузилишидан норози аҳоли ва ИИБ ходимлари ўртасида тўқнашув юз берди (видео)

Жорий йил 14 февраль куни Сурхондарё вилоятининг Олтинсой туманининг «Халқабод» маҳалласи ҳудудида жойлашган фермер хўжалиги ер майдонига маҳаллий фуқаролар ноқонуний уй-жой қуриб олганлиги ҳолатига аниқлик киритиш мақсадида туман ҳокимлиги вакили, туман прокурори, ички ишлар бўлими бошлиғи, вилоят кадастр корхонаси туман филиали масъул ходимларидан иборат ишчи гуруҳ манзилга чиқиб, тушунтириш ишларини олиб борган. Бу ҳақда вилоят ИИБ ахборот хизмати хабар бермоқда.

Вилоят ИИБ ахборот хизмати хабарига кўра, мазкур жараёнда айрим фуқаролар қўлларига турли буюмлар — таёқ, болта, белкурак ва тошлар билан ишчи гуруҳ вакилларига ҳужум қилганликлари оқибатида ўртада жанжал келиб чиққан.

Чақирувга асосан жамоат тартибини сақлаш учун соат 16:00 атрофида воқеа жойига етиб борган туман ИИБ ходимлари жамоат тартибини бузишни тўхтатиб, уйларига тарқашни талаб қилганларида маҳаллий фуқаролардан I.Муҳаммадиев, Д.Муҳаммадиев, Ф.Нуров, А.Тошев, С.Муҳаммадиев ва А.Сафаров ички ишлар органлари ходимларига фаол қаршилик кўрсатиб, қўлларидаги буюмлар билан тажовуз қилган.

Кўрилган чоралар натижасида жамоат тартибини бузаётган фуқаролар зарарсизлантирилиб, вазият барқарорлаштирилган.

Ҳуқуқбузарларнинг тажовузлари натижасида ИИБ ходими сафдор Ш.Мустофоқулов ва профилактика инспектори ёрдамчиси А.Жабборовга тан жароҳатлари етказилган.

Мазкур ҳолат юзасидан Олтинсой туман прокуратураси томонидан терговга қадар текшириш ҳаракатлари олиб борилмоқда.

«Шу ўринда фуқароларимиздан ҳар қандай вазиятда жамоат тартибини бузишларига йўл қўймасликни, низоли вазиятларни қонуний тартибда ҳал этишларига чақириб қоламиз. Мамлакатимизда қонун устуворлиги таъминланади ҳамда айбдорлар қилмишидан қатъий назар жавобгарликка тортилади», — дейилади хабарда.

Сурхондарё вилояти ИИБ ахборот хизмати хабарида икки нафар ИИБ ходими жароҳатлангани ҳақида сўз борган, аммо фуқаролардан жароҳат олганлар тўғрисида маълумот берилмаган. Ижтимоий тармоқларда тарқалган видеоларда бир фуқаро бошидан жароҳат олганини кўриш мумкин.

Аввалроқ Сурхондарёнинг Сариосиё туманида эгнига Президент Шавкат Мирзиёевнинг портретини ёпиштириб олган аёл қўлига болта олиб «снос»га тушган уйини ҳимоя қилаётган видео тарқалганди.