Тошкент шаҳар прокуратураси Бўрижар каналидан жасади топилган аёл бўйича маълумот берди

Тошкент шаҳар Чилонзор туманидаги Бўрижар каналида 13 февраль, пайшанба куни, номаълум аёл кишининг жасади топилгани ҳақда хабар берилган эди. Тошкент шаҳар прокуратураси мазкур ҳолат бўйича «Дарё»га маълумот берди.

Маълум қилинишича, шу куни Чилонзор тумани ИИБга «3-Чарх Комолон» маҳалласи, Байналмилал кўчасидан оқиб ўтувчи Бўрижар каналидан ёши тахминан 55—60 да бўлган, осиё миллатига мансуб аёл кишининг жасади тан жароҳатларисиз топилгани ҳақида хабар келиб тушган.

Чилонзор тумани прокуратураси томонидан ўтказилган терговга қадар текширув давомида жасад Шайхонтоҳур туманида яшовчи 1954 йилда туғилган Н.А.га тегишли эканлиги аниқланган.

Суд-тиббий экспертизасининг дастлабки хулосасига кўра, Н.А.нинг ўлими юқори нафас йўлларининг суюқлик билан беркилиши натижасида механик асфиксиядан келиб чиққан.

Шунингдек, Н.А. 2019 йилнинг сентябрь ойида Россия ва Ҳиндистонга бориб, онкологик касаллик бўйича даволаниб келгани маълум бўлган. Воқеадан уч кун аввал аёлнинг акаси онкологик касалликдан вафот этгани ва аёл бундан сиқилиб юргани аниқланган.

Ҳозирда Чилонзор тумани прокуратураси томонидан мазкур ҳолат бўйича терговга қадар текширув олиб борилмоқда.

Аввалроқ Чилонзор туманидаги «Совпластитал» корхонаси биноси орқасида, Бунёдкор кўчаси бўйлаб оқиб ўтадиган каналдан белига тош боғлаб ташлаб кетилган чақалоқ топилгани ҳақида хабар берилган эди.