Ўзбекистонда эпидемиологик ҳолат юз берганда дори воситаларининг Соғлиқни сақлаш вазирлиги томонидан давлат рўйхатидан ўтказилмасдан олиб кирилишига рухсат берилиши мумкин.
Олий Мажлис Қонунчилик палатаси матбуот хизматининг маълум қилишича, бу ҳақда «Дори воситалари ва фармацевтика фаолияти тўғрисидаги Ўзбекистон Республикаси қонунига ўзгартиш ва қўшимчалар киритиш ҳақида»ги қонун лойиҳасига тегишли ўзгартириш киритилди ва депутатлар томонидан биринчи ўқишда консептуал жиҳатдан қабул қилинди.
Киритилган ўзгаришларда юқумли касалликларни ташхислаш ва даволашда ишлатиладиган дори-дармонлар ва тиббий маҳсулотлар тасдиқланган рўйхатлар асосида рўйхатдан ўтказилмасдан олиб кирилиши назарда тутилган. Хабарда ушбу рўйхатларни шакллантириш тартибига аниқлик киритилмаган.
Депутатлар, шунингдек, кам учрайдиган (орфан) касалликлар ташхиси ва уларни даволашда қўлланиладиган, давлат рўйхатидан ўтмаган тиббий буюмларни мамлакатга олиб киришни ҳам маъқуллади.
Бундай қарорни депутатлар шу каби дориларни ишлаб чиқарувчилар иқтисодий манфаатдорлик бўлмагани сабабли ўз маҳсулотларини Ўзбекистонда мустақил рўйхатдан ўтказишга қизиқиш билдирмаслиги билан изоҳлаган.
Изоҳ (0)