Россиянинг Санкт-Петербург шаҳрида 16 ёшли йигит 3 нафар шериги билан 25 ёшли ўзбекистонлик мигрантга ҳужум қилди. Бу ҳақда «Фонтанка» хабар бермоқда.
Хабарда айтилишича, воқеа 7 февраль куни кечаси, Десантников кўчасида жойлашган истироҳат боғда юз берган. Ўзбекистонлик мигрантга 4 нафар ўсмир яқинлашиб, улардан бири исмини сўраган ва Сирожиддин эканлигини билганидан сўнг ўзини Мирослав деб таништирган ва травматик тўппончадан унинг юзига қарата ўқ узган.
Шифокорлар унга тери йиртилиши жароҳати, чап кўз орбитаси синиши ташхисини қўйган.
10 февралдан 11 февралга ўтар кечаси полиция Мирослав ва унинг шерикларини қўлга олган. Йигит ўзининг бу қилмишини 2 йил аввал мактабда Ўрта Осиёдан бўлган болалар уни таҳқирлаганига жавоб сифатида изоҳлаган.
ТИВ матбуот хизматининг хабар беришича, Ўзбекистоннинг Санкт-Петербург шаҳридаги Бош консулхонаси бу хабарни тасдиқлаган. Унда айтилишича, Ўзбекистонлик йигитга 26-сон шаҳар шифохонасида зарур тиббий ёрдам кўрсатилганидан сўнг рухсат берилган. Бош консулхона вазиятни ўз назоратига олган.
Ўзбекистон Ташқи меҳнат миграцияси агентлигининг Россиядаги ваколатхонаси аниқлаган маълумотларга кўра, жабрланувчи яшайдиган квартирасига ўзи етиб борган ва тез ёрдамни чақирган. Унга дарҳол тиббий хизмат кўрсатилган. Ҳозирда унинг аҳволи қониқарли.
Россия Ички ишлар вазирлиги Санкт-Петербург бўйича Бош бошқармасининг маълумотларига кўра, ҳозирда мазкур жиноятни содир этганликда айбланаётган 3 нафар шахс қўлга олинган ва уларга нисбатан Россия Жиноят кодексининг 111-моддаси билан жиноят иши қўзғатилган.
Изоҳ (0)