Rossiyaning Sankt-Peterburg shahrida 16 yoshli yigit 3 nafar sherigi bilan 25 yoshli o‘zbekistonlik migrantga hujum qildi. Bu haqda “Fontanka” xabar bermoqda.
Xabarda aytilishicha, voqea 7-fevral kuni kechasi, Desantnikov ko‘chasida joylashgan istirohat bog‘da yuz bergan. O‘zbekistonlik migrantga 4 nafar o‘smir yaqinlashib, ulardan biri ismini so‘ragan va Sirojiddin ekanligini bilganidan so‘ng o‘zini Miroslav deb tanishtirgan va travmatik to‘pponchadan uning yuziga qarata o‘q uzgan.
Shifokorlar unga teri yirtilishi jarohati, chap ko‘z orbitasi sinishi tashxisini qo‘ygan.
10-fevraldan 11-fevralga o‘tar kechasi politsiya Miroslav va uning sheriklarini qo‘lga olgan. Yigit o‘zining bu qilmishini 2 yil avval maktabda O‘rta Osiyodan bo‘lgan bolalar uni tahqirlaganiga javob sifatida izohlagan.
TIV matbuot xizmatining xabar berishicha, O‘zbekistonning Sankt-Peterburg shahridagi Bosh konsulxonasi bu xabarni tasdiqlagan. Unda aytilishicha, O‘zbekistonlik yigitga 26-son shahar shifoxonasida zarur tibbiy yordam ko‘rsatilganidan so‘ng ruxsat berilgan. Bosh konsulxona vaziyatni o‘z nazoratiga olgan.
O‘zbekiston Tashqi mehnat migratsiyasi agentligining Rossiyadagi vakolatxonasi aniqlagan ma’lumotlarga ko‘ra, jabrlanuvchi yashaydigan kvartirasiga o‘zi yetib borgan va tez yordamni chaqirgan. Unga darhol tibbiy xizmat ko‘rsatilgan. Hozirda uning ahvoli qoniqarli.
Rossiya Ichki ishlar vazirligi Sankt-Peterburg bo‘yicha Bosh boshqarmasining ma’lumotlariga ko‘ra, hozirda mazkur jinoyatni sodir etganlikda ayblanayotgan 3 nafar shaxs qo‘lga olingan va ularga nisbatan Rossiya Jinoyat kodeksining 111-moddasi bilan jinoyat ishi qo‘zg‘atilgan.
Izoh (0)