Вазирлар Маҳкамаси ҳузуридаги Дин ишлари бўйича қўмита ва Ўзбекистон Мусулмонлари идораси Умра ишларини ташкил этишда Саудия Арабистонининг Al Hidoya Hajj, Umrah & Tourism компанияси билан ҳамкорлик қилиб келади. Ушбу ҳамкорлик 2008 йили бошланган, ўтган вақт ичида Умра ишини ташкил этишда бошқа хорижий ширкат ёхуд маҳаллий турфирмалар мунтазам иштирок этмаган.
11 февраль куни Ахборот ва оммавий коммуникациялар агентлигида ташкил этилган матбуот анжуманида қўмита ва идора вакиллари Умра ишини ташкил этишга оид айрим масалаларга ойдинлик киритди, дея хабар бермоқда «Gazeta.uz» мухбири. Идоранинг халқаро алоқалар бўлими мудири Муҳаммад Акмалхон Шокировнинг маълум қилишича, Ўзбекистон томони қарийб 12 йил давомида Умра ишини ташкил этишда фақат Al Hidoya Hajj, Umrah & Tourism компанияси билан ҳамкорлик қилади.
Мавзуга доир: Дин ишлари бўйича қўмита вакили Ўзбекистонга келаётган сайёҳларга зиёрат одобини ўргатишни таклиф қилди
Анжуманда иштирок этган Uzbekistan Airways авиакомпанияси тижорат ва туризм масалалари бўйича директори Шуҳрат Худойқуловнинг таъкидлашича, ҳар ҳафта тўрт марта Тошкент—Жидда—Тошкент йўналишида парвоз амалга оширилади. Бундан ташқари, Умра зиёратчилари эҳтиёжидан келиб чиқиб, ҳафтасига яна 20 та рейс ташкил этилади. Ушбу парвозда самолётлар Саудия Арабистонинг Мадина ва Жидда шаҳарларига учади.
«Борди-келди учун минимал нарх 633 доллар этиб белгиланган. Бир тарафга парвоз нархи 330 долларни ташкил этади», — дея қайд этди авиакомпания вакили.
Аzon Travel компанияси вакилининг қайд этишича, Тошкент ва Мадина шаҳарлари ўртасидаги масофа 3310 километрни ташкил этади. Тошкент ва Дубай оралиғидаги масофа эса 2194 километр, Тошкент ва Истанбул йўналишида парвоз қилувчи самолёт эса 3340 километр масофани босиб ўтади. Келтирилган масофалар деярли бир хил, аммо Ўзбекистон ва Саудия Арабистони йўналишида нархлар тахминан 30 фоизга қимматлаган.
«2017—2018 йилларда амалга оширилган мазкур йўналишдаги парвозларда чиптанинг нархи бир киши учун қарийб 850 долларни ташкил этганди. Ўзи нарх қандай шаклланади? Аввало, авиакомпания харажатлари, мезбон тарафга тўлайдиган тўловлардан келиб чиқиб, чипта нархи ўрнатилади. Шаҳарлар ўртасидаги масофа яқинлигидан ташқари, ўша шаҳарлардаги аэропортларга тўланадиган бож йиғимлари ҳам бор», — дея қўшимча қилди Шуҳрат Худойқулов.
Аввалроқ Ўзбекистон мусулмонлари идораси вакили Умра визасини ҳар кимга бермаслик бўйича Саудия Арабистонининг Тошкентдаги элчихонасига илтимоснома киритилганини тасдиқлаган эди.
Изоҳ (0)