«Ўзбекистон темир йўллари» АЖнинг соҳага оид бўлмаган йўналишлари кўриб чиқилади. Бу Президентнинг «Илм-маърифат ва рақамли иқтисодиётни ривожлантириш йили» давлат дастурига оид фармони лойиҳасида кўзда тутилган.
Бунда Германиянинг Deutsche Bahn компаниясини жалб этган ҳолда «Ўзбекистон темир йўллари» АЖнинг соҳага оид бўлмаган йўналишларини кўриб чиқиш, темир йўл соҳасида рақобат муҳитини яратиш, йўловчи ва юк ташиш, эксплуатация ва хизмат кўрсатишни бир-биридан ажратиш, хусусий секторни жалб қилиш мумкин бўлган йўналишларини алоҳида ривожлантириш бўйича таклифлар тайёрлаш кўзда тутилади.
Бунинг учун жорий йил 1 июнгача муддат берилган.
Шунингдек, ҳужжатда Ўзбекистон Республикасининг транспорт тизимини 2030 йилгача ривожлантириш стратегияси лойиҳасини ишлаб чиқиш ҳам белгиланган.
Бундан кўзда тутилган мақсад Ўзбекистонни логистика самарадорлик кўрсаткичи бўйича 2030 йилгача дунёнинг 50 талик давлатлари рўйхатига киритиш мақсадида логистикага тегишли 6 та йўналиш бўйича чора-тадбирларни ишлаб чиқиш эканлиги қайд этилган.
Мазкур стратегияни ўз ичига олган Президент қарори лойиҳаси 2020 йил 1 сентябргача тайёрланиши белгиланган.
Изоҳ (0)