Халқаро қидирувга берилган ўзбекистонлик «миллиардер» Қозонда қўлга олинди

Ўзбекистонлик Виктор Ким фирибгарлик, солиқларни тўлашдан бўйин товлаш ва жиноий даромадни легаллаштириш, шунингдек, савдо қоидаларини бузиш ҳамда қалбаки штамплар тайёрлашда айбланмоқда. У етказган зарар миқдори 2,5 миллион долларга баҳоланмоқда, деб хабар берди «Реальное время».

Қайд этилишича, Қозон шаҳрининг Совецкий туман суди қарорига биноан, Ўзбекистон фуқароси Виктор Ким экстрадиция қилиш тўғрисида қарор қабул қилингунга қадар қамоққа олинган.

11 февраль куни суд прокурорнинг 2019 йил октябрь ойида ҳибсга олинган 32 ёшли Виктор Кимга қамоқ муддатини узайтириш ҳақидаги илтимосини кўриб чиқади.

Ўзбекистонда у 162 миллиард рубль (2,5 миллион АҚШ доллари) эквиваленти миқдорида етказилган зарар билан бир қатор жиноятларда айбланмоқда.

Қайд этилишича, Виктор Кимга нисбатан сиртдан айблов Тошкент шаҳрининг жиноят ишлари бўйича Чилонзор туман суди томонидан 2016 йил май ойида тақдим этилган. Прокуратура уни давлатлараро қидирувга берган.

UzNews хабарига кўра, Виктор Ким Ўзбекистон Ички ишлар вазирлиги веб-сайтида қидирувга берилганлар рўйхатида турибди.

Унга пулни ўғрилик, фирибгарлик, солиқларни тўлашдан бўйин товлаш, савдо қоидаларини бузиш ва бошқа айбловлар қўйилган.