Соғлиқни сақлаш вазирлиги 6 февраль куни «Ёрдамчи репродуктив технологиялардан фойдаланиш тартиби тўғрисида»ги низомни тасдиқлади, деб хабар бермоқда Norma.
Эслатиб ўтамиз, ёрдамчи репродуктив технологиялар (ЁРТ)дан фойдаланиш Ўзбекистон қонунчилигига 2019 йилнинг март ойидан жорий этилган эди. Аммо Олий Мажлис Сенати томонидан тасдиқланган ва сунъий уруғлантиришни ҳам ўз ичига олган ЁРТ тартиби ушбу қонунга киритилмаган. «Gazeta.uz»нинг ёзишича, ЁРТдан фойдаланиш тартиби ССВ томонидан белгиланиши таъкидланган.
Мавзуга доир: Элмира Боситханова аборт ва «пробиркадан» олинадиган болалар масаласи хусусида сўз юритди
Мизожлар эса ўз навбатида бепуштлик сабабларини аниқлаш ва ЁРТдан фойдаланиш мақсадида 5 турдаги бирламчи текширувлардан ўтказилади. Текширув муддати 6 ойдан ошмайди. Агар бепуштлик сабаби аниқланган аёлларда консерватив ва жарроҳлик даволаш ўтказилгандан сўнг 9-12 ой давомида ҳомиладорлик кузатилмаса, улар экстракорпорал уруғлантириш усулини қўллашга юборилади.
Ўтказилган бирламчи текширув натижасида бепуштлик сабаби аниқланган 35 ва ундан катта ёшдаги аёллар консерватив ва жарроҳлик даволаш ўтказилмасдан, 9-12 ой муддатсиз шифокорлар консилиумининг қарори бўйича ЁРТ ёрдамида даволашга юборилиши мумкин.Текширув натижаларига кўра, беморларда ЁРТ ёрдамида даволаш усулларини қўллашга қарши кўрсатмалар аниқланганда уларга ЁРТ қўллаш тақиқланади.
Текширув натижаларига кўра, ЁРТ ёрдамида даволаш усулларини қўллашга қарши кўрсатмалар аниқланмаса, қуйидаги даволаш усуллари қўлланилади:
- экстракорпорал уруғлантириш;
- сунъий уруғлантириш;
- хэтчинг;
- криоконсервация;
- сперматозоиднинг интрацитаплазматик инъекцияси.
Изоҳ (0)