Кенг кўламли тадқиқотлар натижалари кўпгина йирик шаҳарлар ҳавосида одамлар, ҳайвонлар ва ўсимликлар учун заҳарли газ миқдори озон қуйи қатлами учун меъёрдан ошиб кетганини кўрсатди. «РИА Новости»нинг ёзишича, тадқиқот натижалари The BMJ журналида чоп этилган.
Қайд этилишича, 20—30 километр баландликда жойлашган ва Ер юзасини қуёшнинг зарарли ультрабинафша нурларидан ҳимоя қиладиган стратосферик озондан фарқли ўлароқ, қуйироқ жойлашган тропосфера озони барча тирик мавжудотлар учун жиддий хавф туғдиради.
Кучли оксидловчи восита сифатида озон кислородсиз радикалларнинг пайдо бўлиши билан боғлиқ кўплаб кимёвий реакцияларда иштирок этади.
Йирик шаҳарлар атмосферасидаги ифлослантирувчи моддалар қуёшда фотокимёвий реакцияга киришганда Ерга яқин озон қатлами даражаси одатда кескин кўтарилади.
Таъкидланишича, кучли смог (асосан АҚШ, Европа ва Япониянинг йирик саноат шаҳарларида тутун, қурум, кул зарралари, чанг, ёнилғи буғи кабилар аралашмасидан иборат заҳарланган ҳаво), айниқса, қуёшли ва шамолсиз об-ҳавода ҳосил бўлади.
АҚШ Миллий фанлар академиясининг махсус ҳисоботига кўра, ер сиртидаги озон инсон организмига умумий заҳарловчи, кансероген ва мутаген таъсир кўрсатади. Шунингдек, унинг нормаси ошиб кетган муҳитда мунтазам бўлиш эрта ўлимга олиб келиши мумкин.
Изоҳ (0)