Жиззахда 52 ва 67 ёшли икки эркак ўртасида рашк сабабли жанжал юз берди ва келишмовчилик пичоқбозлик билан тугади. Бу ҳақда Ўзбекистон Ички ишлар вазирлиги ҳузуридаги Тергов департаменти хабар берди.
Маълуми қилинишича, 9 февраль, якшанба куни, тахминан соат 20:45 да муқаддам судланган 52 ёшли Қ.А., ўзига олдиндан таниш бўлган 39 ёшли аёл Д.Ж.нинг хонадонига борган. Эркак Д.Ж.нинг бугунги кундаги турмуш ўртоғи, 67 ёшли Ф.Х. билан рашк сабабли тортишиб қолган.
Тортишув оқибатида Қ.А. ўзи билан олиб келган пичоқ билан Ф.Х.нинг қорин соҳасига бир марта уриб, тан жароҳати етказган ва шу пичоқ билан ўзига ҳам шикаст етказган.
Натижада Ф.Х. ва Қ.А. олган тан жароҳатлари билан шифохонага мурожаат қилган. Мазкур ҳолат юзасидан Зарбдор тумани ИИБ ҳузуридаги тергов гуруҳи томонидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ жиззахлик эркак бошқа эркаклар билан муносабатда гумон қилиб, ўзининг ҳомиладор рафиқасини ёқиб юборган эди. Тошкентда эркак хотинини пичоқламоқчи бўлганида уни тўхтатган ИИБ ходимини жароҳатлагани ҳақида хабар берилган эди. 31 январь куни Самарқандда қайнука келинойисини пичоқлаб ўлдирган. Ғаллаоролда эса эрини пичоқлаган аёлга нисбатан 3 йил озодликни чеклаш жазоси тайинланган эди. Янги йил кечаси эса Тошкентда ички ишлар органи ходими ҳомиладор рафиқасини дўппослаган.
Изоҳ (0)