Хитойда тарқалган янги турдаги коронавирус қурбонлари сони бир ой ичида 2012 йилги Яқин Шарқ респиратор синдроми (MERS-CоV) оқибатида ҳалок бўлганлар сонидан ошиб кетди, деб хабар беради «РИА Новости».
9 февраль маълумотларига кўра, Хитой ҳудудида коронавирус оқибатида вафот этганлар сони 908 кишига етган, шунингдек, Гонконг ва Филиппинда коронавирус сабаб яна икки киши ўлган. Бундан бир ҳафта олдин коронавирус оқибатида вафот этганлар сони 2002—2003 йилларда атипик пневмониядан вафот этганлар сонидан ошиб кетган эди.
MERS коронавируси биринчи бор 2012 йили Саудия Арабистонида қайд этилган. 2012 йилнинг сентябридан бошлаб дунёнинг 27 мамлакатида жами 2494 киши вирус билан касалланган ва уларнинг 858 нафари вафот этган. MERS билан касалланиш бўйича сўнгги ҳолат жорий йилнинг январида Саудия Арабистонида қайд этилган эди.
Шу билан бирга Хитой ва ЖССТ мутахассислари SARS ҳамда MERS ҳозирги коронавирусдан кўра анча хавфлироқ бўлганлигини таъкидлашмоқда. Чунки SARS’да ўлим ҳолати 9,56 фоизни, MERS’да — 34,4 фоизни ташкил этган. Янги коронавирусда эса ушбу кўрсаткич 2,2 фоиздан бироз юқори.
Изоҳ (0)