Ижтимоий тармоқларда Тошкент вилоятининг Янгийўл тумани аҳолиси янги қурган уйлари бузиб ташланишига қаршилик кўрсатаётгани акс этган видеолавҳа тарқалди.
Бош прокуратура маълумотига кўра, Янгийўл тумани «Қоратепа» МФЙ ҳудудидаги Ғалаба кўчасида якка тартибдаги хонадонлар сони 63 тани ташкил этиб, ишчи гуруҳ томонидан ўрганилганда ушбу хонадонлардан 18 таси суғориладиган ер майдонларида ўзбошимчалик билан қурилганлиги аниқланган.
Аниқланган ўзбошимчалик билан қурилган 18 та ноқонуний қурилма бўйича туман ҳокимлиги томонидан ФИБ Зангиота туманлараро судига даъво аризалари киритилган бўлиб, шундан 4 тасини мажбурий буздириш юзасидан суд қарорлари чиқиб, Мажбурий ижро бюросига юборилган.
2020 йил 5 февраль куни ўзбошимчалик билан эгаллаб олинган ер майдонлари ва ноқонуний қурилмаларни аниқлаш ҳамда бартараф этиш бўйича туман мутасадди ташкилотларидан тузилган ишчи гуруҳ томонидан юқоридаги манзилда назорат тадбири ўтказилган ҳамда ушбу жараён фуқаролар томонидан мобил алоқа воситалари орқали видеотасвирга олинган.
Бугунги кунда қолган 14 та даъво аризалари ФИБ Зангиота туманлараро суди томонидан кўриб чиқилмоқда.
Изоҳ (0)