Қашқадарё вилоятининг Миришкор туманидаги Чандир қишлоқ аҳолисини бир неча йиллар давомида қийнаб келаётган муаммо Олий Мажлис депутати аралашуви билан ҳал этиладиган бўлди. Бу ҳақда «Дарё»га Миришкор туман ҳокимлиги ахборот хизмати раҳбари Файзулла Эшқулов хабар қилди.
Маълум бўлишича, миришкорликлар Олий Мажлис Қонунчилик палатаси депутати Маҳфират Хушвақтова билан учрашди.
Депутат учрашувда фуқаролар томонидан йўлланган Чандир қишлоғи марказидаги 3 километр йўлнинг таъмирталаблиги, туман ҳокимлиги ушбу масалани ҳалигача ҳал этмаётганининг сабаби билан қизиқди. Ҳокимлик масъуллари ушбу муаммо 2020 йилнинг июль ойига қадар ҳал этилишига ваъда берди.
Шунингдек, туманнинг «Маданият» маҳалласида истиқомат қилаётган Зарнигор Шерқулова Қарши давлат университетининг экология ва атроф-муҳитни муҳофаза қилиш йўналишини тамомлаганини, аммо ишга жойлашишда муаммога дуч келаётганини айтди. Олий Мажлис депутати сўровига жавобан ушбу мурожаатни ҳал этиш вазифаси туман ҳокими ўринбосари Хуршид Шаропов зиммасига юклатилди ва тез орада натижа ҳақида ҳам хабар бериш лозимлиги таъкидланди.
Тадбиркор Зуҳриддин Тошқулов эса тадбиркорлик фаолиятини кенгайтириб, янги иш ўринларини яратиш учун ер майдони ва кредит сўраб мурожаат қилди. Унга ҳам бўш бино ажратиладиган бўлди. 34-мактабда ёшлар етакчиси сифатида ишлаб келаётган Ботир Рустамовга кутубхона ташкил этиш учун жой ажратиб бериш ҳам туман масъуллари зиммасига юклатилди.
Изоҳ (0)