Жанубий Кореяда 24 марта коронавирус билан касалланиш ҳолати қайд этилди
Жанубий Кореяда коронавирус билан касалланган 24-бемор қайд этилди, деб хабар берди «РИА Новости» мамлакат Соғлиқни сақлаш вазирлиги маълумотларига асосланиб.
Жанубий Корея ҳукумати 6 февраль куни коронавирус билан касалланишнинг яна бешта ҳолати ҳақида маълумот берди, шу тарзда ўша куни мамлакатда ушбу инфекцияни юқтирганлар сони 23 нафарни ташкил этган эди. Улардан тўққиз нафари вирусни инсондан юқтирган. Икки киши касалликдан тузалган ва уларга уйга жавоб берилган.
Яна 264 киши текширувдан ўтказилмоқда, 1 235 киши касаллар билан алоқада бўлгани учун карантин остида сақланмоқда.
Қайд этилишича, Хитой, Гонконг ёки Макаога бориб қайтган 920 нафар ҳарбий хизматчи ҳам уйларида ёки ҳарбий қисмларда карантинда сақланмоқда.
Коронавирус билан касалланишга оид 24-ҳолат Ухандан эвакуация қилинган фуқарода аниқланган. 28 ёшли Жанубий Корея фуқароси тана ҳарорати юқорилиги учун текширувга жўнатилган фуқаролар орасида бўлмаган.
Унда касаллик аломатлари Асандаги вақтинча яшаш марказида кузатилган. Томоғида оғриқ ҳис қилганидан кейин бемор текширилганида, унда коронавирус аниқланган. Энди у марказий давлат тиббиёт марказига жойлаштирилган.
Бунга қадар Асанда худди шунга ўхшаш ҳолатда 13-касалланиш қайд этилганди. Бемор Ухандан эвакуация қилинган 368 кишининг орасида бўлган. Унда ҳам касаллик аломатлари карантин остига олинганидан кейин кузатилган.
Аввалроқ Жанубий Кореяда коронавирусдан тузалган илк беморга уйга жавоб берилиши ҳақида хабар берилган эди.
Маълумот учун, Хитойда коронавирусдан вафот этганлар сони 636 кишига етди. Мамлакатда умумий ҳисобда 31 161 та касалланиш ҳолати қайд этилди.
