Японияда карантинга олинган саёҳат кемасида коронавирусни юқтириб олганлар сони уч баробарга ошиб, 61 кишига етди. Бу ҳақда мамлакат Соғлиқни сақлаш вазирлигига таяниб, NHK телеканали хабар берди.
Аввалроқ 20 киши коронавирусни юқтириб олгани ҳақида хабар берилганди.
Diamond Princess саёҳат кемаси жорий йилнинг 20 январь куни Ёкогамадан чиқиб, Кагосима—Гонконг—Окинава йўналишидан ўтиб, 3 февраль куни қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган.
Япония Соғлиқни сақлаш, меҳнат ва фаровонлик вазирлиги 5 февраль куни шифокорлар 10 кишида янги коронавирус сабаб бўлган пневмонияни аниқлаганини маълум қилди. Қайд этилишича, вирус гонконглик йўловчи томонидан юқтирилган бўлиши мумкин.
Саёҳатчиларни ташувчи компаниянинг хабар беришича, Японияга самолётда учиб келган 80 ёшли эркак 20—25 январь кунлари Diamond Princess бортида бўлган. Гонконгда мазкур йўловчидан коронавирус топилган.
Ҳукумат вакиллари томонидан хабар берилишича, вирус ташхиси қўйилган кемадаги барча йўловчилар Канагава префектурасидаги касалхонага ётқизилган.
Кема оператори томонидан хабар берилишича, уч нафар япониялик, Хитойнинг уч нафар фуқароси, икки нафар австралиялик ва АҚШнинг бир нафар фуқароси, шунингдек, филиппинлик экипаж аъзоси тасдиқланган ташхис билан касалхонага ётқизилган.
Сўнгги маълумотларга кўра, Хитойда жами 28 060 нафардан ортиқ фуқаро касалланиб, кунлик ўсиш 15,2 фоизни (3 667 нафар) ташкил этмоқда. 564 (2 фоиз) нафар фуқаро ушбу касалликдан вафот этган.
Изоҳ (0)