Чинозда сохта ЙПХ ходими қўлга олинди. У икки йил олдин ҳам худди шу қилмиши учун жазога тортилган

Тошкент вилоятида ички ишлар органи ходимининг кийимини кийиб, қўлбола усулда ясалган кўкрак нишонини тақиб, сохта ЙПХ ходими вазифасини бажараётган фуқаро қўлга олинди. Бу ҳақда Тошкент вилояти ИИББ ЙҲХБ ахборот хизмати «Дарё»га маълум қилди.

6 февраль куни М-39 Тошкент—Термиз халқаро автомобиль йўлида авторадар билан хизмат олиб бораётган Тошкент вилояти ИИББ ЙҲХБ ЙПХ инспекторлари — сафдор Бекжон Ережепов ва сержант Мансур Норматов олдига «КамАЗ» автомобили келиб тўхтайди. Ҳайдовчи инспекторларга йўлда бир ходим ишлаётганлигини, аммо унинг бодикамераси ва кўкрак нишони ғалатироқ эканлигини айтади.

ЙПХ инспекторлари зудлик билан айтилган жойга етиб борган. Инспекторлар Nexia русумли автомобилда ўтирган «ходим»дан кимлигини ва бу ерда нима иш билан шуғулланаётганлигини сўрашганида у воқеа жойидан қочиб кетмоқчи бўлади. Бироқ зудлик билан қўлга олиниб, Чиноз туман ИИБга олиб келинади.

Чиноз тумани ички ишлар бўлими тезкор хизмат вакиллари, хусусан, Ўз хавфсизлик хизмати ходимлари холислар иштирокида унинг бошқарувида бўлган автомашина салонини кўздан кечиришганида, у ердан 24 дона бир хил серия ва рақамли маъмурий баённомалар, Фарғона вилояти ички ишлар бошқармаси томонидан берилган хизмат гувоҳномасининг рангли нусхаси, унинг эгнидаги кийимига ўрнатилган, устига «Диққат» ёзуви туширилган қалбаки бодикамера, елимдан эритиб ясалган ЙПХ инспекторининг кўкрак нишони ва жезл топилган.

«Муқаддам ички ишлар органида ишлаганман, 2016 йилда ўз ихтиёрим билан бўшаганман. Кўкрак нишони ва бодикамерани ўзим қўлбола усулда ясаган эдим. Хато қилдим, бу ишимдан пушаймонман», — дейди сири фош бўлган сохта ЙПХ ходими Азизбек Рўзметов.

Таъкидланишича, Азизбек Рўзматов 2018 йилнинг январь ойида ўзидан сохта йўл патрул хизмати инспектори ясаб, Сирғали тумани ҳудудида ишлаётган вақтда қўлга тушган. Унга нисбатан Жиноят кодексининг 227 ва 228-моддалари 1-қисмида (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) кўрсатилган жиноятларни содир этганлик юзасидан айблов эълон қилиниб, суд қарори билан ахлоқ тузатиш ишлари жазоси қўлланилган эди.

Ҳозирда Чиноз туман ички ишлар бўлими ҳузуридаги тергов бўлими томонидан терговга қадар суриштирув ҳаракатлари олиб борилмоқда.