Фарғонада ўзига нисбатан қонуний чора кўрмаслик ҳамда автомашинасини жарима майдонидан чиқариб бериш эвазига ЙПХ инспекторига 1 млн сўм пора таклиф қилган қоидабузар ҳайдовчи ушланди.
Фарғона вилояти ИИБ матбуот хизматининг «Дарё»га маълум қилишича, жорий йилнинг 3 февраль куни Фарғона шаҳридаги Ал-Фарғоний кўчасида вилоят ИИБ йўл ҳаракати хавфсизлиги бошқармаси инспектори томонидан шубҳали ҳаракатланган Damas русумли автомашина тўхтатилган.
Ҳайдовчи ЙПХ ходими сўровига биноан автомашина ҳужжатларини, яъни транспорт воситасини қайд этиш гувоҳномаси, ҳайдовчилик гувоҳномаси, ишончнома ва мажбурий суғурта полисини тақдим қила олмаган. Шундан сўнг унга нисбатан маъмурий баённома расмийлаштирилиб, автомашина жарима майдончасига жойлаштирилган.
Шундан сўнг Damas ҳайдовчиси ЙПХ инспекторига бир миллион сўм пора таклиф қилиб, ўзига нисбатан қонуний чора кўрмасликни ҳамда автомашинасини жарима майдонидан чиқариб беришни сўрайди.
ЙПХ ходими ҳайдовчининг ноқонуний хатти-ҳаракати устидан ИИБ раҳбариятига ёзган билдиргига асосан ўтказилган тезкор тадбир жараёнида қоидабузар ҳайдовчи 1 млн сўмни пора тариқасида бераётган вақтда ашёвий далил билан ушланган.
Бу Фарғонада ЙПХ ходимларининг порани рад этиши билан боғлиқ биринчи ҳолат эмас. Аввалроқ ЙҲХБ ходимига 500 минг сўм пора беришга уринган ҳайдовчи қўлга олингани ҳақида хабар қилинган эди.
Изоҳ (0)