Турли юқумли касалликлар вируслари кенг тарқалишининг олдини олиш мақсадида Ҳудудий санитария ва эпидемиология марказлари билан тузилган шартномага мувофиқ, «Тошшаҳартрансхизмат» АЖ тасарруфидаги автобус саройлари ҳамда уларга бириктирилган шоҳбекатларда дезинфекция ишлари бошланди.
Тошкент шаҳар ҳокимлиги матбуот хизматининг хабар беришича, ушбу санитария тадбири бир ҳафта давом этади. Бу муддатда автосаройлар ва улардаги транспорт воситалари ҳамда Тошкентдаги барча шоҳбекатларда дезинфекция ишлари бажарилади.
Эслатиб ўтамиз, хориж давлатларида, хусусан, Хитойда хавфли юқумли вирус — коронавирус билан касалланиш ҳолати авж олган. Сўнгги маълумотларга кўра, ушбу вирус қурбонлари сони 500 кишидан ошди. Коронавирус тарқалиши туфайли Хитойдан Ўзбекистон фуқароларини эвакуация қилиш жараёни якунланди.
Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан 5 февраль, чоршанба куни, эълон қилган расмий маълумотларга кўра, 71 нафар фуқародан коронавирус инфекцияси таҳлили учун намуналар олинган.
Коронавирус туфайли Ўзбекистонда тиббий ниқоблар савдоси авжига чиқди. Ижтимоий тармоқлар фойдаланувчиларининг ёзишича, аксарият дорихоналарда тиббий ниқоб тугаб қолган, борлари эса одатдаги нархдан қиммат сотилмоқда. Истеъмолчилар ҳуқуқларини ҳимоя қилиш агентлиги Ўзбекистонда тиббий ниқоблар нархини асоссиз оширган дорихоналар ёпилишини маълум қилди.
Изоҳ (0)