2019 йил давомида тижорат банклари томонидан 67 261 нафар жисмоний шахсга 7,9 триллион сўм миқдорида (2018 йилга нисбатан 66,6 фоизга ёки 3,2 триллион сўмга кўп) ипотека кредитлари ажратилган. Бу ҳақда Марказий банк матбуот хизмати хабар берди.
Мазкур давр мобайнида ажратилган ипотека кредитларининг энг юқори ўсиш кўрсаткичлари Тошкент шаҳри (960 миллиард сўм), шунингдек, Тошкент (535 миллиард сўм) ва Жиззах вилоятлари (304 миллиард сўм) ҳамда Қорақалпоғистон Республикаси (283 миллиард сўм) ҳиссасига тўғри келмоқда.
2019 йилда ажратилган ипотека кредитларининг 96,5 фоизи (7,7 триллион сўм) бирламчи бозорга, 3,5 фоизи (268 миллиард сўм) иккиламчи бозорга йўналтирилган. 2018 йилда мазкур кўрсаткич мос равишда 94,6 фоизни (4,5 триллион сўм) ҳамда 5,4 фоизни (244 миллиард сўм) ташкил этган.
Шунингдек, ипотека кредитлар таркибида имтиёзли асосда (қайта молиялаш ставкаси доирасида) ажратилган кредитлар улуши 83,2 фоизни (6,6 триллион сўм), бозор фоизларида ажратилган кредитлар улуши эса 16,8 фоизни (1,3 триллион сўм) ташкил қилади.
2019 йилда жисмоний шахсларга берилган ипотека кредитларининг 4,8 триллион сўми (61 фоизи) марказлашган ресурслар, 3,1 триллион сўми (39 фоизи) тижорат банклари ресурслари ҳисобидан ажратилган.
Изоҳ (0)