БМТ ва Бутун жаҳон туризм ташкилотининг маълумотларига кўра, сўнгги ўн икки йилда ривожланаётган мамлакатларда туристлар сони асосан табиий ёки экотуризм ҳисобига амалга ошмоқда.
Тошкент вилояти Бўстонлиқ туманининг денгиз сатҳидан 1200 метр баландликда жойлашган Қоронкўл қишлоғи ҳудудида Corrida Food оилавий корхонаси томонидан кичик туризм зонаси ташкил қилинди. Бу ҳақда «Дарё»га корхона вакиллари маълум қилди.
Ҳудуд майдони 176 гектарни ташкил қиладиган бу ерга Австрия давлатидан зотдор 50 та асл буғу ва 45 та Европа кийиги келтирилди.
«Бундан кўзланган мақсад — экотуристлар эътиборини жалб этадиган муҳит яратиш. Тоғли ҳудудларимизда кўзлари порлаб турган асл буғу ва кийикларни чет эллик сайёҳлар томоша қилиб ҳавас қилса, ўз юртдошларимиз ва биринчи навбатда, ёшларимиз табиатни севишни ва асрашни ўрганишидир», — дейди корхона раҳбари Бахтиёр Ҳожиматов.
Шунингдек, унинг таъкидлашича, буғу ва кийик шохларидан фармацевтика соҳасида дори-дармон тайёрлаш учун фойдаланилади. Қолаверса, кийик гўштидан аҳоли саломатлигини мустаҳкамлашга зарур озиқаларга бой сифатли гўшт маҳсулотларини етиштириш назарда тутилган.
Изоҳ (0)