Жанубий Кореяда коронавирусдан тузалган илк беморга уйга жавоб берилади

Жанубий Кореяда коронавирусдан тузалган илк беморга бугун, 5 февраль, куни уйга жавоб берилади. Бу ҳақда мамлакат эпидемия билан курашиш бўйича штаби бошлиғи Чон Ин Гённинг сўзларига асосланиб, «РИА Новости» хабар берди.

Мамлакатда тартиб рақами бўйича иккинчи бўлиб коронавирус билан касаллангани қайд этилган ушбу бемор 13 кун деганда тузалди.

«Бугун, 5 февраль, куни коронавирусни юқтирган иккинчи Жанубий Корея фуқароси тузалди. Унга уйига жавоб берилади. У билан алоқада бўлган яқинлари учун карантин 7 февралда якунига етади», — дейди Чон Ин Гён.

Сўнгги пайтда беморда тана ҳароратининг кўтарилиши ва йўтал кузатилмаган. Уч кун кетма-кет олинган таҳлил натижалари эса унда вирус йўқлигини кўрсатган.

Маълумот учун, Хитойда янги турдаги 2019-nCoV коронавируси билан касалланганлар сони 24,3 мингга етди. Касаллик оқибатида вафот этганлар эса 490 кишини ташкил этмоқда. Жаҳон соғлиқни сақлаш ташкилотининг маълум қилишича, янги турдаги коронавируснинг тарқалишига қаршиш курашиш учун яқин уч ойда 61,5 миллион доллар керак бўлади. Хитойлик вирусологлар атипик пневмонияга қарши вакцина 2019-nCoV коронавирусини тўхтатиши мумкинлигини айтди.

Ўзбекистон 4 февраль куни Хитойдан 250 нафар фуқаросини эвакуация қилди. Уларда коронавирус аниқланмади. Бугун, 5 февраль куни мураккаб эпидемик вазият ҳукм сураётган Ухань шаҳридан яна 84 нафар Ўзбекистон фуқароси олиб келинди.