«Дарё»да «Қашқадарёда бодикамера тақмаган ЙПХ инспектори ҳайдовчидан ҳужжат талаб қилди. Ҳайдовчи эса бунга эътироз билдирди» сарлавҳали мақола эълон қилинганди. Қашқадарё ИИБ мазкур ҳолатга эътибор қаратди.
Вилоят ИИБнинг маълумот беришича, бодикамера тақмаган ҳолда ҳайдовчидан ҳужжат талаб қилган ЙПХ ходими ЙҲХБ ЙПХБ 2-ЙПХ отряди 2-сафарбарлик гуруҳи ЙПХ катта инспектори катта сержанти Бобораҳим Файзуллаев.
ЙПХ инспектори 2020 йил 31 январь куни соат 07:30 ларда ўзининг «ВАЗ-2107» русумли 70 А 529 АА давлат рақам белгили автомашинаси билан Қарши шаҳар томонга ҳаракатланиб келаётган вақтида Damas русумли 70 N 920 NА давлат рақам белгили автомашина Қарши—Косон йўлининг Қарши тумани Узуннаво қишлоғи рўпарасида ўрнатилган светофорнинг тақиқловчи қизил чироғидан ҳаракатланиб келганлиги учун уни ўзининг автомашинаси билан тўхтатган, — дейилади ИИБ ахборот хизмати берган маълумотда. — Катта сержант Б.Файзуллаев автомашинасидан тушиб, ўзининг эътиборсизлиги оқибатида бодикамерасидан фойдаланмаган ҳолда бош кийимини киймасдан Damas ҳайдовчиси Д.Йўлдошевга ўзини таништирмасдан, тегишли ҳужжатларини тақдим қилишини сўраган. Шундан сўнг фуқаро Д.Йўлдошев катта сержант Б.Файзуллаевга «командир одамни қўрқитманг, камерангиз йўқ», деб эътироз билдиради. Шундан сўнг у ўзининг автомашинасидан бош кийимини олиб кийиб, бодикамерасини олган ва Damas русумли автомашина эшигини очиб ҳайдовчига ҳужжатларини тақдим этишни талаб қилиб, автомашина калитини олиб қўйган.Фуқаро Д.Йўлдошев катта сержант Б.Файзуллаевга «командир бунақа қилишга ҳақингиз йўқ», деб эътироз билдирганида ҳайдовчига «нима қилишга ҳаққим бор, нимага ҳақим йўқлигини ўзим биламан», деб у билан қўпол муомалада бўлиб, ҳужжатларини тақдим қилишни талаб қилганида ҳайдовчи ЙПХ инспекторига ҳеч қандай қоида бузмаганлигини, светофорнинг яшил чироғидан ҳаракатланиб келганлигини айтади. ЙПХ инспектори унинг гапларига эътибор бермасдан ҳужжатларини тақдим қилишини, ўзининг «Дилбек» эканлигини тасдиқлаб беришини сўрайди, ҳайдовчи эса ЙПХ инспекторидан автомашина эшигини ёпишни талаб қилади.
Катта сержант Б.Файзуллаев автомашина эшигини ёпиб ҳужжатларини беришни талаб қилганида фуқаро унга «мени қисиб тўхтатдингиз, сизнинг бунга ҳақингиз йўқ. Автомашина калитини ҳам олиб қўйдингиз, бунинг учун ҳам жавоб берасиз, бу ишларингиз учун жавоб берасиз, мен тегишли жойга арз қиламан», деб автомашина ҳужжатларини ЙПХ инспекторига тақдим қилганида у ҳужжатларни олиб, «йўлнинг нариги томонига ўтасиз», деб ўзининг автомашинасига миниб йўлнинг қарама-қарши томонига ўтиб тўхтаган.
Шундан сўнг фуқаро Д.Йўлдошев автомашинасидан тушиб, ҳолатни тасвирга олиб, машинаси очиқ қолаётганига урғу берган ва ЙПХ инспекторининг орқасидан борган.
ЙПХ инспектори фуқарога нисбатан Ўзбекистон Республикаси Вазирлар Маҳкамасининг 2015 йил 24 декабрь кунидаги қарори билан тасдиқланган «Йўл ҳаракати қоидалари»нинг 31-бандида кўрсатилган қоидабузарликни содир этганлиги учун маъмурий баённома расмийлаштирган ва ҳайдовчини маъмурий баённома билан таништириб ҳайдовчилик гувоҳномасини маъмурий баённомага илова қилиб, қолган ҳужжатларини тўлиқ қайтариб берган.
Мазкур ҳолат юзасидан вилоят ИИБ ЙҲХБ масъул ходимлари томонидан хизмат текширув ўтказилмоқда.
Қашқадарё ИИБ ахборот хизмати
Изоҳ (0)