Жорий йилнинг 2 февраль куни Ислом Каримов номидаги Тошкент халқаро аэропортига хорижий давлатлардан 31 та самолёт қабул қилинган, 4472 нафар фуқаро санитария-карантин пунктларида термометриядан ўтказилган. Шулардан 10 нафари Хитой фуқароси, 157 нафари Хитойда ўқийдиган ўзбекистонлик талабаларни ташкил қилган. Бу ҳақда Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлигининг коронавирус инфекциясига қарши курашиш штаби маълум қилди.
Хабар берилишича, «Ўзбекистон темир йўллари» АЖ марказий санитария-эпидемиология хизматига қарашли олтита санитария-карантин пунктидан 2 февраль куни жами 676 нафар фуқаро ўтган, шулардан 34 нафарини хориж фуқароси ташкил этган. Тана ҳарорати кўтарилган беморлар аниқланмаган.
Давлат чегара кесишиш пунктларидаги санитария-карантин пунктлари орқали 1816 та автотранспорт воситаси, 33129 нафар фуқаро ўтказилган, шулардан 15510 нафари чет эл фуқароси ҳисобланади. Мазкур пунктларда ҳам тана ҳарорати кўтарилган фуқаролар аниқланмаган.
Қайд этилишича, Ўзбекистон Соғлиқни сақлаш вазирлиги ҳузуридаги Санитария–эпидемиологик осойишталик агентлиги томонидан коронавирус инфекциясини Ўзбекистон Республикасига четдан кириб келиши ва тарқалишини олдини олиш юзасидан бир қатор тадбирлар амалга ошириб келинмоқда.
Агентликнинг мутахассислари томонидан коронавирус инфекциясига гумон қилинганда эпидемиологик суриштирув ўтказиш, хабар бериш, дезинфекция тадбирларини олиб бориш қўлланмалари тайёрланди.
Санитария-эпидемиологик осойишталик агентлигининг мутахассислари иштирокида Тошкент халқаро аэропорти самолёт экипажлари, борт кузатувчилари ўртасида коронавирус инфекциясини профилактикаси бўйича қайтадан ўқув-амалий семинари ўтказилди.
2020 йил 2 февраль кунига қадар агентлик қошида ташкил этилган штаб ишонч телефони орқали 1559 га яқин фуқародан келиб тушган саволларга жавоб берилган.
Соғлиқни сақлаш вазирлиги билан Ички ишлар вазирлиги ўртасида Хитойдан кириб келган фуқаролар тўғрисида кундалик ахборот алмашинуви йўлга қўйилган. Ушбу фуқаролар тўғрисидаги рўйхат асосида ҳар бир соғлиқни сақлаш бошқармалари ва бирламчи тиббий бўғинлар орқали хонадонма-хонадон юриб, Хитойдан келган фуқаролар 14 кун муддатга тиббий назоратга олинмоқда.
Таъкидланишича, Хитойда коронавирус инфекцияси бўйича кузатилаётган мураккаб эпидемик вазият, бу касалликни республика ҳудудига кириб келиши ва тарқалиб кетишининг олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган.
Соғлиқни сақлаш вазирлиги Ўзбекистонда коронавирус тарқалгани ҳақидаги хабарлар ҳақиқатга тўғри келмаслигини, бугунги кунга қадар Ўзбекистон фуқаролари орасида инфекция қайд этилмаганини маълум қилган эди. Ўзбекистон Ташқи ишлар вазирлиги Россияда 3 нафар ўзбекистонликнинг коронавирус гумони билан касалхонага жойлаштирилганини тасдиқлади.
Ташқи ишлар вазирлиги Хитойдаги ўзбекистонликларни эвакуация қилиш учун Пекиндан Тошкентга чартер рейслар 4 ва 5 февраль кунлари Пекин аэропортнинг 2-терминалидан амалга оширилишини маълум қилиб, Ўзбекистон фуқароларидан 3 февраль, душанба куни, Пекин шаҳридага элчихонага келишларини сўраган. Uzbekistan Airways компанияси Ўзбекистон Президентининг буйруғига биноан, ташкил этилган ҳукумат комиссиясининг қарорига асосан, жорий йилнинг 4—5 февраль кунлари Хитойдаги Ўзбекистон фуқароларини эвакуация қилиш учун учта чартер рейсини амалга оширилишини тасдиқлаган. Санитар-эпидемиологик осойишталик агентлиги Хитойдан келган Ўзбекистон фуқаролари 14 кун муддатга тиббий назоратга олинганини хабар қилган.
Шунингдек, Ташқи ишлар вазирлиги авиақатновлар бекор қилингани сабабли Пекин аэропортида қолиб кетган 3 нафар ўзбекистонлик талабага ёрдам кўрсатилишини маълум қилиб, талабалар билан алоқа ўрнатиб, муаммони ҳал қилиш бўйича дипломатлар тегишли чораларни кўраётганини эълон қилди.
Изоҳ (0)