Китоб туманидаги Шут қишлоғи аҳолиси кучли қор ёғиб, йўллар ёпилиб қолганлиги сабабли қамалда қолди. Nasafnews нашри манзилига юборилган мурожаатда аҳоли шу кунларда катта қийинчиликларга дучор бўлаётгани ёзилади.
Маълум бўлишича, Ҳазрат Султон тоғларининг чўққисида жойлашган қишлоқда 50 хўжалик истиқомат қилади. Қишлоқ туман марказидан 105 километр узоқликда жойлашган.
«8 йил қоғозбозлик билан ҳеч нимага эришмадик. Шунча баландликдан қичқирсак ҳам додимиз ҳеч кимга етмади. Йўлларимизни бир метрдан кўп қалинликда қор ёпиб, машиналар ҳаракатланишининг имкони қолмайди. Биз учун 7,5 километр бўлган дара орқали йўлни очиб бериш наҳотки муаммо бўлса? Ҳатто бир маротаба бўлса ҳам туман ФВ мутасаддилари вазиятни бориб ўрганишмади. Президент порталига бориб қилган мурожаатимизга ҳам вилоят ва Китоб тумани ҳокимликлари бир парча жавоб хати билан қўйнимизни пуч ёнғоққа тўлдиришди. Энг ачинарлиси, воқеликни кўрмасдан, ўрганмай, билмай туриб, ‘қишлоқ аҳли билан бу масалада ўз жойига бориб суҳбатлашдик’, дея ёлғондан баёнот беришларига нима дейсиз?» — дейилади юборилган мурожаатда.
Nasafnews вазиятга ойдинлик киритиш мақсадида Китоб тумани ҳокимлиги билан боғланди.
Ҳокимлик ахборот хизмати берган маълумотда айтилишича, аҳолига йўл қуриб бериш учун 13 миллиард сўмдан кўпроқ маблағ керак, маҳаллий бюджетдан эса бунча маблағ ажратишнинг имкони йўқ. Шу боис муаммони ечишнинг бошқа чоралари усида бош қотирилмоқда.
Изоҳ (0)