2020 йилнинг 3 февраль куни Ўзбекистоннинг Екатеринбург шаҳридаги (Россия) Бош консулхонаси 3 нафар Ўзбекистон фуқароларининг коронавирус гумони билан касалхонага ётқизилгани тўғрисида ОАВ хабарини тасдиқлади. Новосибирск-Тюмень авиарейсида учган Хитой фуқаросида коронавирус аниқланганидан сўнг ушбу рейснинг барча йўловчилари касалхоналарга жойлаштирилган. Бу ҳақда Ўзбекистон Ташқи ишлар вазирлигининг Telegram’даги расмий канали хабар берди.
«Бош консулхона юртдошларимиз жойлаштирилган тиббиёт муассасаси билан алоқа ўрнатди. Шифокорлар берган маълумотга кўра, Ўзбекистон фуқароларининг аҳволи қониқарли ва коронавирус симптомлари кузатилмаган. Уларнинг анализлари Тюмень ва Новосибирск тиббиёт муассасаларига юборилган, у ерда пухта ўрганилганидан сўнг тиббий хулоса берилади», – дейилади хабарда.
Шунингдек, ТИВ консуллик-ҳуқуқий департаменти Россиянинг Урал федерал округи (Курган вилояти, Свердловск вилояти, Тюмен вилояти, Челябинск вилояти, Ханти-Мансийск автоном округи – Югра, Ямал-Ненецк автоном округи) ҳудудида бўлиб турган Ўзбекистон фуқаролари зарур ҳолатларда Ўзбекистоннинг Екатеринбург шаҳридаги Бош консулхонасига +7 343 276 31 66, +7 343 272 31 33 телефон рақамлари орқали мурожаат қилиши мумкинлигини эслатиб ўтган.
Соғлиқни сақлаш вазирлиги Ўзбекистонда коронавирус тарқалгани ҳақидаги хабарлар ҳақиқатга тўғри келмаслигини, бугунги кунга қадар Ўзбекистон фуқаролари орасида инфекция қайд этилмаганини маълум қилган эди.
Ташқи ишлар вазирлиги Хитойдаги ўзбекистонликларни эвакуация қилиш учун Пекиндан Тошкентга чартер рейслар 4 ва 5 февраль кунлари Пекин аэропортнинг 2-терминалидан амалга оширилишини маълум қилиб, Ўзбекистон фуқароларидан 3 февраль, душанба куни, Пекин шаҳридага элчихонага келишларини сўраган. Uzbekistan Airways компанияси Ўзбекистон Президентининг буйруғига биноан, ташкил этилган ҳукумат комиссиясининг қарорига асосан, жорий йилнинг 4—5 февраль кунлари Хитойдаги Ўзбекистон фуқароларини эвакуация қилиш учун учта чартер рейсини амалга оширилишини тасдиқлаган. Санитар-эпидемиологик осойишталик агентлиги Хитойдан келган Ўзбекистон фуқаролари 14 кун муддатга тиббий назоратга олинганини хабар қилган.
Шунингдек, вазирлик авиақатновлар бекор қилингани туфайли Пекин аэропортида қолиб кетган 3 нафар ўзбекистонлик талабага ёрдам кўрсатилишини маълум қилиб, талабалар билан алоқа ўрнатиб, муаммони ҳал қилиш бўйича дипломатлар тегишли чораларни кўраётганини эълон қилди.
3 февраль тонгидаги маълумотларга кўра, Хитойдаги коронавирус қурбонлари сони 361 нафарга етган.
Изоҳ (0)