Қашқадарёда боди-камера тақмаган ЙПХ инспектори ҳайдовчини тўхтатди. Ва ҳужжат талаб қилди. Ҳайдовчи эса бунга эътироз билдирди. Бу ҳақда «Дарё»га шикоят қилган ҳайдовчи Дилбек Йўлдошев воқеа жорий йил 31 январь куни содир бўлганини айтиб, инспекторга боди-камераси йўқлигини айтгани, эътироз билдиргани ёқмаганини таъкидлайди.
https://youtu.be/Q9IwDK7_2cA
Маълум бўлишича, ЙПХ инспектори Damas ҳайдовчиси Дилбек Йўлдошевни Қарши шаҳридан Косон туманининг Гувалак қишлоғига қайтаётган пайт йўлда тўхтатган. Ҳамда қизил чироқда ҳаракатлангани боис тўхтатганини айтган.
— ЙПХ инспектори мени тўхтатган пайт боди-камера тақмаганди, аммо шундай бўлса-да, ҳужжатларимни кўрсатишимни талаб қилди, — дейди Дилбек Йўлдошев. — Аслида боди-камераси бўлмаган инспектор ҳайдовчини тўхтатишга ва ҳужжат талаб қилишга ҳақлимас-ку. Қолаверса, мен қизил чироқда кўра била туриб ҳаракатланмайман.
Видеода кўринишича, ҳайдовчи ЙПХ инспекторига боди-камераси йўқлигини айтиб, эътироз билдиради. Ходим эса машинасидан боди-камерасини олиб, қўлида ушлаб турган ҳолда ҳайдовчидан ҳужжат талаб қила бошлайди.
— Машинам эшигини мажбуран очиб, калитимни ҳам тортиб олди, — дейди Дилбек Йўлдошев. — Ходимнинг бунга ҳаққи борми?
Мурожаатчининг таъкидлашича, ЙПХ инспектори унга тўхташ ишорасини бермаган. Уни тўхтатиш учун машинасида йўлнинг қарама-қарши томонига чиқиб, ўзи ҳам йўл қоидасини қўпол равишда бузган.
— Ходим менга тўхташ ишорасини бермаганди, қолаверса ходимнинг жилети ва жезла таёқчаси ҳам йўқ эди. Тўхтатиш учун ўзининг машинасида йўлнинг қарама-қарши томонига ўтиб, йўлимга чиқди, — дейди ҳайдовчи Дилбек Йўлдошев. — Ходим ҳайдовчини тўхтатиш учун ўзи қоидабузарлик қилсин деб белгиланмаган-ку. Қоида ҳамма учун бир хил. Ҳамма унга амал қилиши керак. Қоидани буздими ўзи ҳам жаримага тортилсин.
Видео давомида ҳайдовчи ходимнинг хатти-ҳаракати нотўғрилигини айтиб, унга эътироз билдиришда давом этади. Ходим эса «бунга мен жавоб бераман», — дейди.
— Ҳужжатларимни тақдим этганимдан сўнг, ходим ҳужжатимни олиб кетиб қолди, — дейди ҳайдовчи. — Қоидабузарлигим бўлса, ўша ерда маъмурий баённома тузса бўларди-ку.
Видео давомида кўринишича, ҳақиқатан ҳам ЙПХ инспектори ҳайдовчи ҳужжатларини олгач, «йўлнинг нариги томонига ўтинг» деб автомобиллар ҳаракатига қарама-қарши турган автомобилида воқеа жойидан кетади.
Дилбек Йўлдошевнинг қўшимча қилишича, кўчанинг нариги томонида унга светафорнинг қизил чироғида ҳаракатланиб келиш айби қўйилиб, маъмурий баённома тузилган.
— Ноҳақлик бўлганини айтиб, ҳамма жойга мурожаат қилдим, аммо фойдаси йўқ. Ҳеч ким мени эшитмаяпти, — дейди Дилбек Йўлдошев. — Ҳақиқат қарор топишини истайман.
Изоҳ (0)