Абдулазиз Комилов Майкл Помпео билан музокара ўтказди

Ўзбекистон Ташқи ишлар вазири Абдулазиз Комилов 3 февраль куни мамлакатга расмий ташриф билан келган АҚШ давлат котиби Майкл Помпео билан учрашди.

Вазирлик матбуот хизматининг хабар беришича, учрашувда икки томонлама муносабатларнинг ҳолати ва истиқболлари ҳамда минтақадаги вазият юзасидан фикр алмашилди. Президент Шавкат Мирзиёевнинг 2018 йил май ойида АҚШга ташрифи ва президент Дональд Трамп билан музокаралари якунига кўра қабул қилинган стратегик шерикликнинг янги даври бошланиши тўғрисида қўшма баёнот қоидаларини изчил амалга ошириш, кўп қиррали ҳамкорликни чуқурлаштиришга томонлар содиқ эканлиги тасдиқланди.

Ташқи сиёсат идоралари раҳбарлари турли соҳалардаги ўзаро манфаатли алоқалар мустаҳкамланаётганлиги ва жадал ривожланаётганлигини мамнуният билан таъкидлаб, шу нуқтаи назардан сўнгги икки йил ичида савдо ҳажми икки баравар ўсганини қайд этган.

АҚШ давлат котиби Ўзбекистон Президенти томонидан давлат бошқарувини модернизация қилиш, жамиятни демократлаштириш, иқтисодиётни либераллаштириш ва қонун устуворлигини мустаҳкамлаш борасида олиб борилаётган ислоҳотларни юқори баҳолади.

Музокараларда, шунингдек, маданий-гуманитар соҳадаги ҳамкорликни кенгайтириш, диний эркинликни таъминлаш ва мажбурий меҳнатга барҳам бериш бўйича олиб борилаётган чораларга ҳам алоҳида эътибор қаратилган.

Тадбирда АҚШ элчиси Дэниел Розенблюм ҳам иштирок этган.