Буюк Британия бугун, 31 январь куни, 1973 йилда қўшилган Европа Иттифоқида охирги кунини ўтказади, деб ёзмоқда «ТАСС». Лондон вақти билан соат 23:00 да мамлакат аъзолиги роппа-роса 47 йил-у 31 кун давом этган иттифоқ таркибидан чиқади.
Энди Европа Иттифоқи 27 та давлатдан иборат бўлади. Европа ҳамжамияти бутун тарихи давомида уни фақат 3 та ҳудуд — Франциянинг Жазоир (1962), Дания автоном ҳудуди — Гренландия (1985 йилда), Франциянинг Кариб денгизидаги мулки — Сент-Бартс ороли (2012 йилда) тарк этган.
Бироқ ушбу ҳудудларнинг барчаси Европа ҳамжамиятига суверен, Европа давлатлари сифатида эмас, балки уларнинг метрополиялари — Франция ва Даниянинг бир қисми сифатида киритилган. Қолаверса, улар ҳар йили Буюк Британия каби Европа Иттифоқи бюджетига (ЕИдан ажратмалар ва олинган маблағларни ҳисобга олган ҳолда) 11 миллиард фунт стерлинг пул ўтказмаган.
Шундай қилиб, бугун британияликларнинг 2016 йилги референдумда билдирган иродаси амалга ошади. Ўшанда сайловчиларнинг 52 фоизи Brexit’ни ёқлаб чиққан, бироқ ушбу келишувга эришиш учун 3,5 йил ва кетма-кет бир неча кечиктиришлар керак бўлди.
Қайд этилишича, Буюк Британияда Европа Иттифоқидан чиқиш шарафига махсус байрам уюштирилиши кутилмаяпти. Шу куни вазирлар маҳкамаси Буюк Британиянинг келажагини муҳокама қилиш учун фавқулодда йиғилиш ўтказади. Бунда йиғилиш пойтахтда эмас, Англия шимолидаги шаҳарлардан бирида бўлиб ўтади.
Brexit’ни амалга ошириш муносабати билан Лондондаги Парламент майдонида Буюк Британия байроқлари кўтарилади. Даун стритдаги вазирлик резиденцияси биноси деворида қиролликнинг Европа Иттифоқи таркибидан чиқиши дақиқаларини кўрсатувчи соат тасвири акс эттирилади.
Шунингдек, ушбу муҳим санадан эсдалик сифатида 3 миллионта 50 пенслик тангалар муомалага чиқарилади.
Хабарда айтилишича, кутилаётган воқеанинг тарихий аҳамиятига қарамай, Британия ва Европа Иттифоқи фуқароларининг оддий ҳаёти камида яқин 11 ой давомида ўзгармайди. Буюк Британия Европа Иттифоқини расман тарк этиши билан 2020 йил 31 декабргача мўлжалланган ўтиш даври кучга киради. У Brexit сабаб юзага келиши мумкин бўлган муаммоларнинг олдини олиш учун махсус ишлаб чиқилган.
Эслатиб ўтамиз, 30 январь куни Европа парламенти Буюк Британиянинг Евроиттифоқ таркибидан чиқиши бўйича келишувни маъқуллаган эди.
Изоҳ (0)