Хитойнинг Ухань шаҳри мэри Чжоу Сяньван маҳаллий аҳоли олдида ўз айбига иқрор эканлиги белгиси сифатида ўз лавозимидан истеъфога чиқишни режалаштирмоқда. Ухань янги турдаги коронавирус тарқалишининг асосий ўчоғига айланди, деб ёзмоқда «Коммерсантъ».
«Агар бу вирус тарқалишининг олдини олишга ёрдам берса, мен истеъфога чиқишни ва шу тарзда кечирим сўрашни истайман», — деди шаҳар мэри Марказий Хитой телевидениесига берган интервьюсида.
Аввалроқ, эпидемия тарқалиши муносабати билан маҳаллий ҳокимият шаҳарни ёпишга қарор қилган эди. Шаҳар мэрининг маълум қилишича, бундай қарор инсоният тарихида биринчи марта қабул қилинган. Унинг сўзларига кўра, ёпилиш қарори ҳақиқатан ҳам қаттиқ чора эди.
Шу билан бирга, Чжоу Сяньван шаҳар ёпилганда барча чоралар керакли даражада кўрилмаганлигини тан олди. «Биз кузатув остидаги ёки карантин остида бўлганларни бепул маҳсулотлар, тайёр овқат ва тиббий хизмат билан таъминлаймиз. Бироқ ушбу чораларнинг баъзилари ҳанузгача мукаммал эмас», — дея қўшимча қилди у.
Аввалроқ ЖССТ мазкур эпидемия юқори даражада хавфли эканлигини маълум қилган эди.
Хитойдаги коронавирус эпидемиясидан вафот этганлар сони 106 кишига етди, яна салкам 1300 та янги касалланиш ҳолатлари тасдиқланди. Хитойда коронавирусни даволаш 1-2 ҳафта вақт олиши маълум қилинди.
Маълумот учун, Хубэйдаги Ухань шаҳри коронавирус ўчоғи ҳисобланади. Бундан ташқари, яна ўндан ортиқ мамлакатда, хусусан, Германияда ҳам худди шу вирус билан касалланиш ҳолатлари аниқланган.
Эпидемия сабаб Хитойдаги умумий аҳолиси 57 миллион кишига тенг 15 та шаҳар тўлиқ ёки қисман ёпилган. Хитой раҳбари Си Цзиньпин вазиятни мураккаб деб атаган.
АҚШ ва Япония Уханьдан ўз фуқароларини олиб чиқиб кетишни режалаштираётгани маълум қилинди. Ўзбекистон Ташқи ишлар вазирлиги эса Хитой ҳозирда чет эл фуқароларини Уханьдан эвакуация қилиш масаласини кўриб чиқмаётгани ҳақида хабар берди.
Изоҳ (0)