Си Цзиньпин ЖССТга коронавирусни енгишга ваъда берди
Хитой президенти Си Цзиньпин мамлакатда тарқалган янги турдаги коронавирусни енгиш мумкинлигига ишонмоқда. У бу ҳақда Жаҳон соғлиқни сақлаш ташкилоти бош директори Тедрос Аданом Гебрейесусга маълум қилди. Касаллик авж олганлиги муносабати билан ЖССТ раҳбари айни пайтда Хитойда ташриф билан бўлиб турибди. Бу ҳақда «Коммерсантъ» хабар берди.
«Мен бунга ишонаман, биз вирусни, албатта, енгамиз. Фақатгина ишониш керак, чунки биз бир қайиқда бўлганимиз учун илмий усулларни ва аниқ самарали чораларни қўллаймиз », — деб айтиб ўтган Си Цзиньпин. Шунингдек, ХХР раиси эпидемия билан боғлиқ вазиятни шахсан ўзи кузатиб бораётганини таъкидлаган.
Бир неча кун олдин Си Цзиньпин Пекинда Хитой коммунистик партияси Сиёсий бюроси доимий қўмитасининг йиғилишини ўтказган ва унда эпидемияга қарши курашиш учун махсус гуруҳ тузишга қарор қилинган. Хитой расмийларининг ўзи аҳволни «ўта жиддий» деб баҳолаган. Шунингдек, касалланган кишиларни даволаш мақсадида касалхоналар қуриш учун давлат бюджетидан 43,2 миллион доллар ажратилади.
Аввалроқ ЖССТ мазкур эпидемия юқори даражада хавфли эканлигини маълум қилган эди.
Хитойдаги коронавирус эпидемиясидан вафот этганлар сони 106 кишига етди, яна салкам 1300 та янги касалланиш ҳолатлари тасдиқланди. Хитойда коронавирусни даволаш 1-2 ҳафта вақт олиши маълум қилинди.
Маълумот учун, Хубэйдаги Ухань шаҳри коронавирус ўчоғи ҳисобланади. Бундан ташқари, яна ўндан ортиқ мамлакатда, хусусан, Германияда ҳам худди шу вирус билан касалланиш ҳолатлари аниқланган.
Эпидемия сабаб Хитойдаги умумий аҳолиси 57 миллион кишига тенг 15 та шаҳар тўлиқ ёки қисман ёпилган. Хитой раҳбари Си Цзиньпин вазиятни мураккаб деб атаган.
АҚШ ва Япония Ухандан ўз фуқароларини олиб чиқиб кетишни режалаштираётгани маълум қилинди. Ўзбекистон Ташқи ишлар вазирлиги эса Хитой ҳозирда чет эл фуқароларини Ухандан эвакуация қилиш масаласини кўриб чиқмаётгани ҳақида хабар берди.
