Samarqand viloyatining Paxtachi tumanida toshdan oltin moddasi ajratish sexi faoliyati fosh etildi. Bu haqda “Daryo”ga Bosh prokuratura matbuot xizmati xabar berdi.
Ma’lum bo‘lishicha, fuqaro J.Q. va boshqalar “Navoiy kon-metallurgiya kombinati” davlat korxonasiga qarashli “Qoraqo‘ton” tog‘ tizmasidagi maxsus hududdan yashirin ravishda tarkibida qimmatbaho oltin moddasi bo‘lgan tosh xomashyosini o‘g‘rilik yo‘li bilan kavlab olib, “I.E.” MChJga qarashli issiqxonada yashirin sex tashkil qilib, tosh mahsulotlarini qayta ishlash orqali oltin moddasini ajratib olish faoliyati bilan shug‘ullanib kelgan.
Departamentning Paxtachi tuman bo‘limi hamda tuman prokuraturasi xodimlari tomonidan hamkorlikda o‘tkazilgan tezkor tadbirda ulardan 445 kilogramm tog‘ toshlari, 666 kilogramm qum hamda tog‘ jinslarini bo‘laklash va maydalashga mo‘ljallangan qo‘lbola usulda yasalgan tegirmon va boshqa jihozlar ashyoviy dalil sifatida olingan.
“Navoiy kon-metallurgiya kombinati” davlat korxonasining kimyoviy ekspertizasi xulosasiga ko‘ra, ashyoviy dalil sifatida olingan qum va toshlarning tarkibida ma’lum miqdorda oltin moddasi mavjudligi aniqlanib, ularning umumiy qiymati 12,2 million so‘mni tashkil etgan.
Mazkur holat yuzasidan J.Q. va boshqalarga nisbatan Jinoyat kodeksining tegishli moddasi bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)