Бугун, 28 январь куни, Фарғона шаҳридаги 2-оилавий поликлиникада калтакланган ҳамширанинг ҳолати акс этган сурат ижтимоий тармоқларда тарқалди. ССВ матбуот хизмати хабарига кўра, вазият Фарғона вилояти соғлиқни сақлаш бошқармаси мутахассислари томонидан ўрганилди.
Маълум бўлишича, воқеа ултратовуш текшируви (УТТ) ўтказиладиган хонада юз берган. Ултратовуш текшируви ўтказувчи шифокор Машҳура Тошматова ва унга бириктирилган ҳамшира Матлуба Маъмурова беморларни навбат билан қабул қилишаётганда бемор қиз ва унинг онаси тиббиёт ходимларига тажовуз қилиб, ҳамширани калтаклаган.
«Фуқароларни навбат билан қабул қилиб текширувдан ўтказаётган эдик. Навбат 1992 йилда туғилган бемор қизга етиб келганида у билан бирга хонага ёш бола кўтарган она ҳам кирди. Ёш болали аёл боласи касаллиги, инжиқлик қилиб тинимсиз йиғлаётгани, ташқарида ҳам 3 ёшли фарзанди совуқда изиллаб тургани, иккита бола билан қийналиб кетганини айтиб, навбатсиз кўрикдан ўтказиб қўйишни илтимос қилди. Шунда мен навбати етиб кирган қизга ‘Агар рози бўлсангиз шу болали аёлни сиздан олдин кўриб қўйсам’, деб рухсат сўрадим. Қиз эса таклифимга кўнмай, ўзининг касал эканини айтиб, навбатини бермади. Шу боис унинг ўзини текширишни бошладим. Шу жараёнда қизга ёш болали аёлга навбатини берса, қанчалик савоб иш қилган бўлиши мумкинлигини тушунтириб насиҳат қилдим», — дейди шифокор Машҳура Тошматова.
Шифокор қизни текширувдан ўтказиб, белгиланган тартибда ташхисни ёзиб берган, қиз эса эшитган насиҳатидан асабийлашиб, хонадан чиқиб кетган. Кўп ўтмай хонага онаси билан кириб келган. Аёл УТТ хонасига кирибоқ «Нега қизимни ҳақорат қиласанлар?» деб бақира бошлаган. Тиббиёт ходимлари вазиятни тушунтиришса ҳам, аёл уларни эшитмай УТТ шифокорига электр чойнакни отиб юборган.
Шунда ҳамшира аёлни тинчлантирмоқчи бўлиб, унинг ёнига келганида жазавага тушган она ва бола ҳамширага очиқчасига тажовуз қилиб, қўли билан уриб, оёқлари билан тепиб тан жароҳати етказган. Тўполонни эшитган бошқа ходимлар хонага чиқиб, она ва болани ташқарига олиб чиқиб кетган. Поликлиника маъмурияти дарҳол тез тиббий ёрдам бўлимига, воқеа ҳақида профилактика инспекторига хабар берган.
Етиб келган тез ёрдам машинаси юзи қонга беланиб, ҳушидан кетган ҳамширани ўзига келтириб, биринчи ёрдам кўрсатгач, оғир ҳолатда Республика шошилинч тиббий ёрдам илмий маркази Фарғона филиалига олиб кетган. Ҳамширага ёпиқ калла-мия жароҳати, бош мия чайқалиши, бурун суяги синиши, бурундан қон кетиши ташхиси қўйилган.
Ҳудуд профилактика инспектори, лейтенант Абдували Қўчқоровнинг маълум қилишича, ҳозирда мазкур ҳолат бўйича зарур ҳужжатлар юритилиб, дастлабки суриштирув ишлари олиб борилмоқда.
«Шуни таъкидлаш жоизки, юқоридаги жанжалкаш она-бола ўтган йил 18 январь куни Республика шошилинч тиббий ёрдам илмий маркази Фарғона филиали 3-тез тиббий ёрдами подстанцияси ҳамшираси Дилафрўз Бозоровани ҳам сабабсиз ҳақорат қилиб, таҳдид қилганда аранг қочиб қолганлиги қайд этилган. Ушбу ҳолатга нисбатан ҳеч қандай чора кўрилмаган эди. Ўйлаймизки, бу сафар мазкур воқеага тез орада ҳуқуқий баҳо берилади», — дейилади вазирлик хабарида.
Изоҳ (0)