Ижтимоий тармоқларда электр ўчгани туфайли телерадиокомпания эфирларида узилиш бўлгани айтилди. Энергетика вазирлиги ушбу маълумотни инкор этди

28 январь куни ижтимоий тармоқларда «ЎзТВда ‘свет’ ўчиб қолди, эфирда 1 соатлик узилиш бўлди» сарлавҳали материал эълон қилинди. Унда Ўзбекистон миллий телерадиокомпаниясида электр ўчиб қолгани учун мамлакат бўйлаб 27 январь куни соат 17:00 дан 18:00 гача телевизор экранлари қоп-қора бўлиб тургани айтилган.

Энергетика вазирлиги матбуот хизмати ушбу хабарга муносабат билдирди.

Қайд этилишича, Ўзбекистон миллий телерадиокомпанияси жойлашган Шайхонтоҳур тумани ҳудудида 27 январь куни электр таъминотида умуман узилиш бўлмаган.

Шунингдек, Ўзбекистон миллий телерадиокомпанияси электр таъминотининг мустаҳкамлиги юқори бўлиб, 4 та алоҳида кириб келган юқори кучланишли электр тармоқларига уланган.

Қолаверса, электр таъминотида узилиш кузатилганда ҳам марказий телерадиокомпания захира манбайига эга бўлиб, у автоматик равишда электр таъминотига уланишини маълум қиламиз, дейилади хабарда.

Эслатиб ўтамиз, 2019 йилнинг 27 ноябрь куни электр таъминотидаги узилиш туфайли Тошкентда ТВ орқали жонли эфирда кўрсатилаётган сайлов дебати электр ўчгани сабаб узилиб қолган эди. Ўшанда Энергетика вазирлиги ушбу ҳолатни электротехник қурилмалар носозлиги билан изоҳлаган.