Ўзбекистон иқтисодиёти учун асосий хатарлар ички омиллар билан боғлиқ. Марказий банкнинг пул-кредит сиёсати шарҳи шундан далолат бермоқда, дея хабар беради Spot.
Европа ва Марказий Осиёда иқтисодий ўсиш тикланмоқда (2019 йилдаги 2 фоиз ўрнига 2,6 фоиз), нефть нархи прогнози бир баррели учун 60—62 доллар атрофида сақланиб қолмоқда, айрим давлатларда бюджет қоидалари қўлланмоқда.
Буни инобатга олган ҳолда, мамлакат иқтисодиёти ривожи учун ташқи омиллар томонидан хатар эҳтимоли юқори эмас.Бироқ мавҳумликлар барибир сақланиб қоляпти. Жумладан, асосий савдо шериклари, хусусан, Хитой иқтисодиётининг 2020 йилдаши ўсиш прогнози заиф ва ноаниқ қолмоқда.
Хитой иқтисодиёти ўсиши секинлашиши унинг сўрови динамикаси заифлашувини акс этади. Бу эса асосий экспорт товарлари, жумладан, қора ва рангли металлар нархлари пасайишига олиб келиши мумкин.
Ўзбекистонда 2020 йили иқтисодий вазият ривожига асосан ички омиллар таъсир кўрсатади.
Бюджет даромадлари ва харажатлари ўртасидаги тафовут қисқариши кутилмоқда. Бу унинг танқислиги кўрсаткичини икки баравардан кўпроқ, 2019 йилдаги 7,7 триллион сўмдан (ЯИМнинг 1,5 фоизи) 2020 йилдаги 3,4 триллион сўмгача (ЯИМнинг 0,5 фоизи) қисқартириш имконини беради.
Умумий фискаль баланс тақчиллиги 2019 йилдаги ЯИМнинг 3,9 фоизидан 2020 йилдаги ЯИМнинг 2,7 фоизигача тушиши тахмин қилинмоқда. Бу эса иқтисодиётга нисбатан камроқ инфляция босимини ўтказади.
Бунинг фонида 2020 йилда аҳоли даромадлари, жумладан, иш ҳақи ўртача даражасининг мўътадил ўсиши кутилмоқда (давлат секторида кутилаётган ўсиш — 14,4 фоиз).
Юқорида санаб ўтилган ташқи ва ички омилларни ҳисобга олиб, Марказий банк 2020 йилда иқтисодий ўсиш 5,2—5,5 фоиз атрофида бўлишини тахмин қилмоқда.
Изоҳ (0)