Банк тизимидаги депозитларнинг долларлашув даражасининг пасайиши ва сўмдаги депозитлар ўсишининг тезлашиши кузатилди. 2019 йил давомида миллий валютадаги депозитларнинг умумий пул массасидаги улуши 38,6 фоиздан 42,2 фоизгача кўпайди. Хорижий валютадаги депозитларнинг улуши эса дастлабки икки ойда 34,8 фоизгача ошган бўлса, йил якунига қадар 31,2 фоизгача пасайди, дейилади Марказий банк шарҳида.
Маълумотларга кўра, 2019 йил августда миллий валюта курсининг кескин қадрсизланиши (9,0%) аҳолининг жамғариш кайфиятига таъсир ўтказган ва натижада миллий валютадаги депозитларнинг йиллик ўсиши 4,3 фоиз бандга секинлашган (62,5 фоиздан 58,2 фоизгача).
2019 йилнинг август ойида хорижий валютадаги муддатли депозитлар ўсиш суръати 5,1 фоиз бандга тезлашди (31,8 фоиздан 36,9 фоизгача). Сентябрь—декабрь давомида миллий валюта курсининг барқарор бўлиши хорижий валютадаги муддатли депозитлар ўсиш суръатининг икки баробарга (36,9 фоиздан 18,4 фоизгача) пасайишига хизмат қилди.
Фоиз ставкалари2019 йил охиридада жисмоний шахсларнинг депозитлари бўйича ўртача тортилган фоиз ставкаси сентябрь ойидаги 18,2 фоиздан, декабрь ойига келиб 19,7 фоизгача ўсди.
Миллий валютадаги муддатли депозитларнинг таркиби ва даромадлилиги таҳлили, депозитларнинг муддати ортиши билан ўртача тортилган фоиз ставкалари ҳам ошиб бораётганлиги кўрсатмоқда. Бу, ўз навбатида, узоқроқ муддатли пул ресурсларига бўлган талабнинг юқорилиги билан изоҳланиб, банклар ўртасида узоқ муддатли омонатларни жалб қилиш бўйича рақобатнинг кучаяётганлигидан далолат беради.
Изоҳ (0)