Қадрли, 17 ёшли Коби!Эртадан сенинг орзуларинг амалга ошишни бошлайди. Ахир сен энди «Лейкерс» учун ўйнайсан. Сен оила ва дўстларинг келажагига қандай сармоя киритишни тушуниб олишинг керак. Тўғри, бу гаплар жуда осон, содда эшитилиши, шу билан бирга унчалик зукколикни талаб қилмаслиги ҳам рост гап. Аммо бунга бироз вақт ажратганинг маъқул.
Шунчаки бериш эмас, балки сармоя киритиш лозим!
Келақол, сенга тушунтиришга ҳаракат қиламан.
Баъзан атрофингиздагиларга керак бўлган нарсани бериш — тўғри қадам. Боиси то ёшликдан ўсиб-улғайгунингга қадар улар ёнингда бўлади. Сен эса уларни яхши кўрасан. Демак, ўз муваффақиятларингни улар билан бўлишиш ҳам керак. Сен уларга машина, уй сотиб олиб берасан, ҳамма харажатларини бўйнингга оласан шундайми? Буларнинг ҳаммаси нима учун, албатта, уларнинг яхши яшаши учун, тўғрими?
Бироқ бир кун келиб ҳаммасини тушуниб етасан: яқинларингга қанча ғамхўрлик қилиб, уларга катта эътибор қаратаверсанг, уларни ривожланишдан, ҳамма-ҳаммасидан тўхтатиб, чеклаб қўйган бўласан.
Барчасини уларнинг фойдаси, манфаати учун қилган бўлсанг-да, барибир қилганларинг ортида ўз хотиржамлигинг, хурсандчилигинг ётганини тушуниб етасан. Бу эса худбинликдан ўзга нарса эмас. Лекин ўша вақтда жуда ҳам ўзингдан мамнун бўласан ва ўзинг билмаган ҳолда яна уларнинг орзулари, хоҳишларини йўқ қилишда давом этасан. Сен уларга яшаш учун керак бўладиган моддий бойликларни тақдим этдинг, бироқ ҳаётдаги энг асосийларидан маҳрум қилдинг: мустақиллик ва ривожланиш имкониятидан.
Шундай экан, сен уларга шунчаки совға қилма, балки уларнинг келажаги учун сармоя кирит!
Шахс сифатида ривожланиш ва мақсадларга эришишда керак бўладиган нарсалар учун ўз номинг ва муваффақиятларингдан фойдалан. Уларни ўқит, ишида ёрдам бер. Шунда улар ўз ҳаётининг бир бўлагига бўлса ҳам хўжайин бўлади. Уларни кўпроқ меҳнат қилиш ва содиқ бўлишга унда. Ҳозир турган жойингга қандай қилиб келганингни ва кейин қаерда бўлишингни тушунтир, кўрсатиб бер.
Ушбу мактубни тезроқ ишга киришишинг учун ҳозир ёзяпман. Ишон, оқибати ёмон бўлиши мумкин. Агар ҳозир ҳаммасини тўғри тушунсанг, келажакда атрофингдагиларни пойдевори ғазаб ва ҳақоратлар эвазига қурилган гиёҳвандлик балосидан даволанишига ҳожат қолмайди.
Вақти келиб ўзинг гувоҳи бўласан: улар мустақил равишда ўсаётгани, ривожланаётгани, олдига қўйган вазифаларини бажараётганини кўрасан. Шунда ўртадаги муносабатларинг аслида шундай бўлиши керак эканлигини тушуниб етасан.
Сенга янада кўпроқ ёзишим мумкин эди. Бироқ сен эндигина 17 ёшдасан. Ва сенинг эътиборингни 2000 дан ортиқ сўзга қарата олмаслигимни ҳам яхши биламан.
Кейинги сафар бизнесда қариндошлар билан қандай қилиб муносабат юритиш ҳақида ҳикоя қилиб бераман. Ҳозир эса бир нарсани яхшилаб эслаб қол: ота-онанг молиявий таъминотчинг бўлиб эмас, балки ҳар доим ота-онанг бўлиб қолиши керак.
Биринчи шартномангга имзо чекишдан олдин, унинг қайси қисми яқинларингнинг гўзал ҳаётига, қайси қисми эса бизнесингни ривожлантириш ва даромадларингни кўпайтиришга кетишини ўйлаб кўр.
Шу тариқа сенинг невара, чевараларинг ҳам оиланинг келажак авлодларига сармоя киритиш имкониятига эга бўлиши, сен бошлаган йўлни давом эттиришлари мумкин.
Тез орада сенинг ҳаётинг ўзгариб кетади. Кўп нарсалар тезда йўқ бўлиб кетади. Бироқ навбатдаги 9 соатлик машғулотлардан сўнг дам олишга ётган вақтинг буларни барчасини унутишга ҳаракат қил.
Ҳаётингни ҳозирдан режалаштира бошласанг, келажакда дуч келишинг мумкин бўлган кўплаб муаммоларнинг олдини олган бўласан. Ҳаттоки ҳозирги баъзиларини ҳам!
Чексиз муҳаббат ила Коби!
2016 йил, 21 июль
Америкалик афсонавий баскетболчи Коби Брайант 2020 йил, 26 январь куни вертолёт ҳалокати натижасида вафот этди. У билан бирга 13 ёшли қизи Жанна ҳам дунёдан кўз юмди. «Қора мамба» лақаби билан машҳур бўлган Коби «Лос-Анжелес Лейкерс» билан беш марта NBA чемпионлигини қўлга киритган. Шунингдек, у АҚШ терма жамоаси билан Пекин—2008 ва Лондон—2012 Олимпиадаларида ғолиб чиққан. Брайант 2016 йилда фаолиятини якунлаган эди. Ушбу мактуб эса The Players’ Tribune учун спортчи томонидан 2016 йил, 21 июлда ёзилган эди.
Изоҳ (0)